Alarmi për sulm terrorist pranë bazës amerikane në Britani: Si çoi një telefonatë drejt arrestimit të pesë të dyshuarve

Pesë shtetas britanikë, të moshave 23 deri në 25 vjeç, ndodhen në paraburgim pas një operacioni të gjerë kundër terrorizmit në afërsi të bazës ajrore RAF Fairford në Gloucestershire. Autoritetet britanike kanë konfirmuar se të arrestuarit po hetohen për përgatitjen e një sulmi terrorist, ndërsa ekspertët po analizojnë provat e sekuestruara brenda tre automjeteve të dyshimta të gjetura në zonë. Sipas të dhënave zyrtare, tre prej të ndaluarve janë banorë të Westminster-it, një nga Camden dhe një tjetër nga Willesden, të gjithë nga Londra. Fillimisht, ata u ndaluan për shkelje të ligjeve mbi eksplozivët, por akuzat u ashpërsuan më pas në dyshime për terrorizëm, çka i lejon policisë t’i mbajë ata nën arrest deri në 14 ditë pa nevojën e një akuze formale. Zanafilla e këtij operacioni ishte një telefonatë emergjence rreth orës 00:45 të së dielës. Një banore e zonës, e cila po kthehej në shtëpi, njoftoi policinë pasi vuri re tre furgonë që kishin bllokuar rrugën pranë bazës, ndërsa burrat që ndodheshin brenda tyre po shpërndaheshin në drejtime të ndryshme. Kjo dëshmi çoi në ndërhyrjen e shpejtë të forcave të armatosura në zonën e Welford. Si masë paraprake sigurie, rreth 85 banesa në afërsi të bazës u evakuuan, ndërsa u krijua një perimetër sigurie. Ekipet e çaktivizimit të bombave të Ushtrisë Britanike përdorën robotë të telekomanduar për të kontrolluar furgonët. Hetimet paraprake sugjerojnë gjetjen e materialeve që mund të lidhen me mjete shpërthyese të improvizuara, ndonëse analiza e hollësishme është ende duke vazhduar. Në qendër të hetimeve është edhe motivi i të arrestuarve dhe lidhja e mundshme me aktorë të jashtëm. Ndonëse në media është përfolur për një lidhje të mundshme me Iranin, autoritetet britanike nuk kanë bërë asnjë konfirmim zyrtar. Nga ana tjetër, Ambasada iraniane në Londër i ka hedhur poshtë këto pretendime, duke i cilësuar si spekulime keqdashëse që nxisin “iranofobinë”. Baza RAF Fairford mbetet një pikë strategjike, pasi përdoret nga Forcat Ajrore të SHBA-së dhe ka shërbyer shpesh si bazë për bombarduesit amerikanë në misione të ndryshme. Zëvendës Ndihmës Komisionerja Vicky Evans, e cila po drejton hetimet, e ka cilësuar këtë operacion si jashtëzakonisht kompleks dhe u ka bërë thirrje qytetarëve të shmangin spekulimet, duke theksuar se hetimet po vijojnë në disa pista të ndryshme.