Kurti kërkon statusin e vendit kandidat: Hapat e deritanishëm të Kosovës drejt BE-së nuk po pasqyrohen drejt

Kryeministri i vendit, Albin Kurti, ka ritheksuar se anëtarësimi në Bashkimin Evropian përbën synimin kryesor dhe strategjik afatgjatë të Kosovës, duke bërë thirrje për avancim më të shpejtë në këtë proces. Këto deklarata kreu i ekzekutivit i bëri gjatë një konference për media, të mbajtur pas takimit që patur me ambasadorin e BE-së në Kosovë, Dirk Schuebel. Me këtë rast, ai vlerësoi se faza aktuale e vendit tonë në rrugën eurointegrative nuk përkon me të arriturat reale në terren. Kurti theksoi se ky angazhim prioritar është evidentuar qartë edhe në dokumentin e fundit vlerësues për vendin, duke përsëritur mesazhet e përcjella në takimet e nivelit të lartë me personalitete ndërkombëtare. “Nuk mund ta lëmë pa e thënë se pozita e Kosovës në procesin e anëtarësimit nuk e pasqyron progresin që kemi bërë. Siç kemi nënvizuar në të gjitha takimet dhe vizitat, në të gjitha nivelet dhe rastet ku na është dhënë mundësia, në veçanti me presidentin Costa, pastaj presidentën von der Leyen, komisioneren Kos, kancelarin Merz, presidentin Macron dhe shumë udhëheqës të tjerë të shteteve anëtare, Kosova meriton të marrë statusin e shtetit kandidat për anëtarësim dhe të fillojë negociatat sa më shpejt që të jetë e mundur”, u shpreh Kurti.