Tronditje në strukturat e sigurisë në Serbi: Vihet në pranga komandanti i Njësisë Speciale Antiterroriste

Autoritetet serbe kanë ndërmarrë një hap të bujshëm gjatë ditës së martë, duke arrestuar komandantin e Njësisë Speciale Antiterroriste (SAJ), Igor Zhmiric, me urdhër të Prokurorisë së Parë Themelore në Beograd. Sipas të dhënave jozyrtare, Zhmiric është ndalur në kuadër të një operacioni të gjerë të zhvilluar nga inspektorët e Sektorit të Kontrollit të Brendshëm pranë Ministrisë së Punëve të Brendshme, aksion ky që ka çuar në pranga gjithsej pesë persona. Operacioni ka shënjestruar gjithashtu katër pjesëtarë aktualë dhe ish-efektivë të Njësisë për Mbrojtjen e Personave dhe Objekteve (JZO), të cilët dyshohen se kanë qenë të përfshirë në ndërhyrjet e dhunshme policore të ndodhura gjatë muajve korrik dhe gusht të vitit 2025 përgjatë bulevardit “Kralja Aleksandra”, në afërsi të Fakultetit Juridik në kryeqytetin serb. Gjatë atyre protestave, disa studentë pësuan lëndme trupore dhe u shoqëruan me forcë nga strukturat e rendit, ndërsa situata degradoi kur policia hyri brenda hapësirave të Fakultetit Juridik, duke shkelur hapur autonominë e institucionit universitar. Ndaj komandantit Zhmiric rëndonte tashmë një kallëzim penal për përfshirje të drejtpërdrejtë në ndalimin dhe keqtrajtimin e qytetarëve dhe studentëve gjatë tubimit protestues të 14 gushtit të vitit të kaluar në Beograd. Karriera e tij e gjatë në aparatin e sigurisë ka nisur dikur në radhët e Njësisë për Operacione Speciale (JSO), për të vazhduar më pas në Xhandarmëri, Njësinë Kundër Terrorizmit dhe në Njësinë për Mbrojtjen e Personave dhe Objekteve, ku ka shërbyer në postin e zëvendëskomandantit. Më pas, pas shkarkimit paraardhësit të tij Spasoje Vuleviq, Zhmiric ishte promovuar dhe emëruar në krye të njësisë elitare SAJ. Këto arrestime vijnë si pjesë e hetimeve intensive që po zhvillohen lidhur me dhunën dhe keqtrajtimet e ushtruara ndaj studentëve dhe qytetarëve gjatë valës së protestave në vend.