Tregti e paligjshme armësh në Gjakovë: Pronari i poligonit dyshohet se shiti mbi 110 armë dhe sajoi vjedhjen e tyre

Prokuroria Themelore në Gjakovë ka vënë në shënjestër tre persona, të cilët dyshohet se janë përfshirë në një skemë të shitjes së paautorizuar të më shumë se 110 armëve të zjarrit, sasi kjo që ruhej në depon e një poligoni të licensuar në këtë qytet. Sipas të dhunave zyrtare të Prokurorisë, i dyshuari kryesor me inicialet V.C., gjatë periudhës nga fillimi i muajit tetor 2026 e deri më 30 tetor të këtij viti, brenda ambienteve të poligonit të armëve “T…”, dyshohet se ka tregtuar në mënyrë ilegale mbi 110 armë zjarri. Blerës të këtyre armëve dyshohet se janë dy persona të tjerë, me inicialet D.P. dhe L.U., të cilët aktualisht janë shpallur në kërkim pasi ndodhen në arrati. Për t'i fshirë gjurmët e këtij transaksioni të paligjshëm, hetuesit dyshojnë se V.C. kishte kurdisur një skenar, duke u paraqitur në Policinë e Kosovës për të denoncuar rrejshëm se armët gjoja i kishin vjedhur. Ndaj të dyshuarit V.C. tashmë është lëshuar aktvendim për nisjen e hetimeve zyrtare, ndërkohë që organi i akuzës i është drejtuar Gjykatës Themelore në Gjakovë me kërkesë zyrtare për caktimin e masës së paraburgimit prej 30 ditësh. Procedura hetimore ka nisur edhe në drejtim të dy të dyshuarve të tjerë, D.P. dhe L.U., mbi bazën e dyshimit se kanë kryer veprën penale të importit, eksportit, furnizimit, transportimit, prodhimit, këmbimit, ndërmjetësimit ose shitjes së paautorizuar të armëve apo materieve plasëse. Në të njëjtën kohë, pronari i poligonit, V.C., përveç tregtisë së paligjshme, po hetohet edhe për veprën penale “Lajmërimi apo kallëzimi i rremë”, e cila sanksionohet sipas nenit 382, paragrafi 1, të Kodit Penal të Republikës së Kosovës. Për momentin, autoritetet e akuzës nuk kanë bërë të publike detaje shtesë lidhur me destinacionin apo vendndodhjen aktuale të armëve të shitura, si dhe për hapat e tjerë që do të ndërmerren në kuadër të këtij operacioni hetimor.