Vazhdojnë protestat në kryeqytet: Kërkohet drejtësi për Arlinda Zekajn dhe masa urgjente për sigurinë e grave

Për të tetën ditë radhazi, qytetarët janë mbledhur në sheshet e Prishtinës për të kërkuar drejtësi për tragjedinë e Arlinda Zekajt, si dhe për të gjitha gratë e tjera të humbura si pasojë e dhunës në Kosovë. Kjo protestë, e cila vazhdon të organizohet nga Kolektivi për Mendim dhe Veprim Feminist, thekson gjithashtu nevojën imediate për garantimin e sigurisë dhe mbrojtjes për të gjitha gratë në vend. Gjatë tubimit të sotëm, pjesëmarrësit kanë përsëritur thirrjet e tyre drejtuar institucioneve, duke kërkuar shkarkimin e menjëhershëm të ministres së Drejtësisë, Donika Gërvalla, ministrit të Punëve të Brendshme, Xhelal Sveçla, si dhe kryetarit të Komunës së Pejës, Gazmend Muhaxheri. Po ashtu, lista e kërkesave të protestuesve përfshin edhe largimin nga detyra të Kryeprokurores Lumturije Vuçetaj, prokurores Suada Rama Hamza, kryetarit të gjykatës Shemsedin Haxhiaj, gjykatësit Migjen Kastrati, drejtores së Qendrës për Punë Sociale (QPS), Shpresa Lukaj, si dhe të çdo zyrtari tjetër që konsiderohet i përfshirë në këtë situatë.