Përplasje dhe tensione para Kryeministrisë: Policia shoqëron aktivistët, protestuesit bllokojnë furgonin

Një situatë e tensionuar është regjistruar këtë të mërkurë pasdite në kryeqytet, gjatë zhvillimit të një proteste, ku efektivët e rendit kanë ndërhyrë duke shoqëruar disa prej pjesëmarrësve. Tensioni ka arritur kulmin në momentin kur mjeti i policisë është përpjekur të largohet nga vendngjarja, pasi turma e protestuesve është vënë përballë tij për të bllokuar rrugën dhe për të pamundësuar largimin e të shoqëruarve. Burime pranë ngjarjes bëjnë me dije se në brendësi të furgonit ndodheshin aktivistët Edison Lika dhe Dritan Goxhaj. Sipas të dhënave, ata kishin kundërshtuar marrjen e fletës së gjobës të lëshuar për tubimin e organizuar gjatë ditës. Të njëjtat burime konfirmojnë se dy aktivistët u kishin shfaqur efektivëve të policisë dokumentacionin dhe lejen e rregullt për zhvillimin e protestës në sheshin përballë Kryeministrisë, megjithatë kjo nuk ka shërbyer për të shmangur shoqërimin e tyre drejt komisariatit. Gjatë përpjekjeve të qytetarëve për të penguar lëvizjen e mjetit, situata ka eskaluar në përleshje fizike mes protestuesve dhe forcave të rendit. Pavarësisht rezistencës së ashpër dhe tentativave të njëpasnjëshme për bllokim, furgoni i policisë ka arritur përfundimisht të çajë rrethimin e turmës dhe të largohet.