Modernizimi i FSK-së në fokus: Kryeministri Kurti takon gjeneralin amerikan Stephen E. Osborn

Kryeministri i Republikës së Kosovës, Albin Kurti, i shoqëruar nga Komandanti i Forcës së Sigurisë së Kosovës, Gjenerallejtënant Bashkim Jashari, ka zhvilluar një takim zyrtar me Agjutantin e Përgjithshëm të Gardës Kombëtare të Ajovës, Gjeneralmajor Stephen E. Osborn. Gjatë këtij takimi, kreu i ekzekutivit kosovar ka vlerësuar lart kontributin dhe mbështetjen e vazhdueshme që Garda Kombëtare e Ajovës i ka dhënë FSK-së, veçanërisht në fushat e trajnimit profesional, edukimit, zhvillimit të lidershipit ushtarak, si dhe në planifikimin operacional dhe logjistik. Ai ka nënvizuar se ky bashkëpunim përfaqëson një partneritet të dyfishtë, i cili lidh Kosovën ngushtë si me shtetin e Ajovës, ashtu edhe me Shtetet e Bashkuara të Amerikës në tërësi. Temë qendrore e diskutimit mes kryeministrit Kurti dhe gjeneralmajor Osborn ishin hapat nismëtarë dhe të domosdoshëm të vendit në ndërtimin e industrisë së mbrojtjes. Po ashtu, palët trajtuan gjendjen aktuale të sigurisë në Kosovë dhe rajon, duke u pajtuar se Republika e Kosovës luan një rol kyç në ruajtjen e paqes dhe stabilitetit në Ballkanin Perëndimor.