Ministri Maqedonci diskuton në Berlin me zyrtarin e lartë të NATO-s për rrugëtimin euroatlantik të Kosovës

Ministri i Mbrojtjes i Kosovës, Ejup Maqedonci, i cili po qëndron për vizitë zyrtare në Berlin, ka zhvilluar një takim me ambasadorin Dr. Detlef Wachter, Përfaqësues i Përhershëm i Gjermanisë në NATO. Nëpërmjet një njoftimi publik, ministri Maqedonci ka bërë të ditur se gjatë këtij takimi është biseduar mbi mundësitë e intensifikimit të partneritetit dypalësh ndërmjet Kosovës dhe Gjermanisë, me theks të veçantë në fushën e sigurisë dhe mbrojtjes. Gjatë bisedës, palët janë ndalur te shqyrtimi i formave konkrete për shkollimin, trajnimin dhe avancimin profesional të pjesëtarëve të Forcës së Sigurisë së Kosovës në akademitë dhe kurset zyrtare të Aleancës Veriatlantike. Sipas Maqedoncit, një nga pikat kyçe të takimit ka qenë edhe ambicia strategjike e Republikës së Kosovës për t'u bërë pjesë e NATO-s, si dhe roli jetik dhe mbështetja që aleatët tanë mund të japin në këtë drejtim. Gjermania vijon të konfirmohet si një ndër aleatët strategjikë kryesorë të vendit tonë, duke dhënë një kontribut të çmuar si në ngritjen e kapaciteteve ushtarake ashtu edhe në përshpejtimin e proceseve të integrimit euroatlantik të Republikës së Kosovës.