Epokë e artë që mbyllet: Ikona e trajningut gjerman largohet nga stoli pas dy dekadash

Frank Schmidt, strategu i Heidenheimit dhe njëkohësisht trajneri me jetëgjatësinë më të madhe në një stol në historinë e futbollit profesionist gjerman, ka vendosur t'i japë fund aventurës së tij në krye të skuadrës në përfundim të këtij sezoni. Lajmi është zyrtarizuar këtë të mërkurë nga klubi që aktualisht militon në kategorinë e dytë të futbollit gjerman, duke mbyllur kështu një periudhë prej gati dy dekadash. Në moshën 52-vjeçare, Schmidt mori frerët e drejtimit të Heidenheimit në shtator të vitit 2007, periudhë kur skuadra ishte pjesë e kategorisë së katërt. Ai arriti të thyejë rekordin historik në vitin 2023, duke kaluar shifrën prej 16 vitesh në krye të një klubi profesional në Gjermani, një arritje kjo e pashembullt në futbollin modern të këtij vendi. Duke folur për largimin e tij, tekniku u shpreh: “Vërtet ishte mbresëlënëse të shihja se sa shumë përpjekje bëri klubi për të siguruar një vazhdim të kontratës me mua”. Ai gjithashtu shtoi: “Megjithatë, gjatë javëve të fundit kam arritur në përfundimin se ka ardhur koha për të marrë një vendim. Pas gati 20 vjetësh si trajner i parë i FCH-së, thjesht dëshiroj të bëj një pushim këtë verë”. Në mesazhin e tij përmbyllës, Schmidt theksoi: “Një gjë është e sigurt: së bashku, ne te FCH kemi shkruar një histori të jashtëzakonshme në futbollin profesionist gjerman përgjatë shumë viteve, por kapitulli i fundit ende nuk është shkruar”. Nën drejtimin e tij, Heidenheimi arriti suksesin historik të ngjitjes në Bundesligë në vitin 2023, ndërsa vetëm dymbëdhjetë muaj më vonë siguroi një biletë për në fazën e grupeve të Ligës së Konferencës. Pasi u largua nga elita e futbollit gjerman sezonin e kaluar, skuadra e Heidenheimit pozicionohet aktualisht në vendin e gjashtë të renditjes në Bundesliga 2.