Delegacioni i Kosovës viziton Parlamentin e Zvicrës, paralajmërohet takimi i rëndësishëm me Presidentin Parmelin

Shefi i Konsullatës së Republikës së Kosovës në Cyrih, z. Vigan Berisha, i shoqëruar nga anëtarët e korit konsullor të këtij qyteti, ka realizuar një vizitë zyrtare në selinë e Parlamentit Federal të Zvicrës në Bernë. Gjatë këtij udhëtimi institucional, delegacioni kosovar patën mundësinë të njihen nga afër me ecurinë, trashëgiminë parlamentare dhe mekanizmat funksionalë të institucioneve federale helvetike. Kjo vizitë shërbeu si një platformë e shkëlqyer për të zhvilluar takime me figura të shquara të skenës politike zvicerane, duke u cilësuar si një hap tejet domethënës për intensifikimin e bashkëpunimit dypalësh dhe afrimin mes trupit diplomatik dhe shtetit nikoqir. Me këtë rast, z. Vigan Berisha i drejtoi një falënderim të sinqertë Zvicrës dhe qytetarëve të saj, duke vënë në pah lidhjen e pashkëputur që shqiptarët kanë kultivuar ndër dekada me këtë vend mik. Për komunitetin shqiptar, Zvicra nuk përfaqëson vetëm një hapësirë ku kanë siguruar mirëqenie ekonomike dhe profesionalizëm, por është shndërruar në një vatër të dytë. Aktualisht, në këtë shtet janë të vendosura dhe veprojnë disa breza të mërgatës sonë, përfshirë tashmë edhe gjeneratën e katërt, të cilat janë përfshirë suksesshëm në strukturat e shoqërisë zvicerane, pa humbur gjuhën, traditat dhe identitetin e tyre kombëtar. “Një jetë në Zvicër” mbetet refreni më i përsëritur nga mijëra bashkatdhetarë, të cilët pikërisht në tokën helvetike kanë ngritur familjet, karrierat dhe vizionin e tyre për të ardhmen. Duke evokuar marrëdhëniet e veçanta mes dy shteteve, z. Berisha theksoi se populli shqiptar nuk do t'i shlyejë kurrë nga kujtesa momentet kur Zvicra i doli në krah Kosovës, veçanërisht gjatë periudhave më kritike të historisë moderne. Ndihma zvicerane ka krijuar një shtrat të pashlyeshëm në kujtesën kolektive të qytetarëve dhe diasporës sonë. Ai shtoi se çdo shqiptar që jeton në Zvicër kultivon një ndjenjë të fortë përkatësie dhe mirënjohjeje për hapësirën, mbështetjen dhe mikpritjen e ofruar ndër vite. Në këtë linjë, edhe institucionet e Kosovës përcjellin respektin dhe mirënjohjen e tyre të përjetshme për popullin dhe shtetin zviceran, të cilët kanë dëshmuar solidaritet të palëkundur. Vizita në Parlamentin Federal dëshmon edhe një herë partneritetin e fortë dhe miqësinë historike mes dy vendeve, e cila ushqehet nga kontributi i çmuar i diasporës shqiptare. Ndërkaq, burimet bëjnë me dije se z. Vigan Berisha do të zhvillojë sot në orën 16:00 një takim zyrtar me Presidentin e Zvicrës, Shkëlqesinë e Tij, z. Guy Parmelin. Detaje shtesë lidhur me ecurinë dhe rëndësinë e këtij takimi do të publikohen në vazhdim, sapo të sigurohen të dhëna të reja. Zvicra vijon të qëndrojë si një ndër aleatët më të rëndësishëm të Kosovës, kurse mirënjohja e shqiptarëve ndaj këtij shteti mbetet një urë lidhëse që trasmetohet nga brezi në brez.