Këmbanat e alarmit nga Konfindustria: Ekonomia shqiptare drejt një krize strukturore, deficiti tregtar thyen rekordet

Konfindustria ka ndezur alarmin mbi të ardhmen e ekonomisë shqiptare, duke paralajmëruar se viti 2027 mund të shënojë një përkeqësim të ndjeshëm të treguesve makroekonomikë. Përmes një memorandumi zyrtar drejtuar Kuvendit të Shqipërisë, në kuadër të diskutimeve për paketën fiskale të vitit 2027, kjo organizatë ka evidentuar sfida kritike që kërcënojnë stabilitetin e monedhës vendase dhe qëndrueshmërinë e përgjithshme ekonomike. Sipas analizës së Konfindustrisë, treguesit për vitin e ardhshëm janë mjaft pesimistë. Deficiti tregtar pritet të arrijë në shifrën rekord prej 5.8 miliardë eurosh për vitin 2026, një rritje prej 200 milionë eurosh krahasuar me vitin 2025. Ky fenomen, sipas ekspertëve, tregon një varësi të thelluar nga importet dhe një dobësim të kapaciteteve prodhuese të vendit tonë. Sektorët prodhues po përjetojnë një periudhë të vështirë, ku industria është në rënie për të pestin vit radhazi, ndërsa bujqësia vijon trendin negativ për të katërtin vit. Kjo situatë dëshmon humbjen e konkurrueshmërisë së ekonomisë shqiptare në tregjet rajonale. Gjithashtu, sektori i turizmit po përballet me vështirësi të ngjashme, duke humbur terren ndaj vendeve fqinje. Konfindustria shpreh shqetësim edhe për sektorin e ndërtimit, i cili zë rreth 18% të Prodhimit të Brendshëm Bruto. Organizata paralajmëron se goditjet nga SPAK ndaj aktiviteteve të paligjshme, të ndërthurura me varësinë e lartë të ndërtimit nga burimet informale të financimit, mund të shkaktojnë tronditje të forta. Kjo tkurrje e kapitalit informal, e shoqëruar me rënien e prodhimit, mund të rrezikojë stabilitetin e lekut dhe rrjedhimisht, rendin kushtetues dhe atë shoqëror. Mes faktorëve që po frenojnë zhvillimin, Konfindustria përmend qartazi praninë e monopoleve, oligopoleve dhe praktikave të tipit kartel në sektorët strategjikë. Këto fenomene, të shoqëruara me korrupsionin dhe dobësinë institucionale, mbeten pengesat kryesore për një treg të lirë dhe të shëndetshëm. Një vëmendje e veçantë i është kushtuar ndryshimeve në taksimin e karburanteve. Ndonëse projektpaketa fiskale propozon heqjen e taksës së qarkullimit prej 27 lekësh për litër, Konfindustria shprehet skeptike se kjo masë do të reflektohet në xhepat e konsumatorëve. Për shkak të mungesës së konkurrencës në të gjitha hallkat e zinxhirit të karburanteve – nga portet deri te pikat e shitjes – ekziston rreziku real që ky përfitim të përvetësohet si marzh fitimi nga kompanitë tregtare, në vend që të çojë në uljen e çmimit për qytetarët.