Tragjedia në Elbasan, flet kryebashkiaku Llatja: Vijojnë kërkimet për 69-vjeçarin, dëme të rënda në ndërtesë

Kryetari i Bashkisë së Elbasanit, Gledian Llatja, ka dalë në një deklaratë zyrtare për mediat pas shpërthimit të fuqishëm që tronditi një pallat 5-katësh në qytet, ngjarje kjo që solli pasoja tragjike dhe dëmtime të konsiderueshme në strukturën e ndërtesës. Sipas kreut të bashkisë, deri më tani konfirmohet humbja e jetës së një gruaje 83-vjeçare, ndërsa ekipet e shpëtimit janë në terren duke vijuar kërkimet intensive për gjetjen e një 69-vjeçari që rezulton ende i pagjetur. Ndërkohë, 10 persona të tjerë janë dërguar drejt spitalit për të marrë trajtimin e nevojshëm mjekësor dhe për të kryer kontrolle të detajuara. “Një shpërthim ka ndodhur në një pallat 5-katësh. Është vënë re një dëmtim i strukturës së pallatit. Kemi pasur një shembje të katit të 4-t, i cili ka rënë në katin e 3-të, si dhe të shkallëve lidhëse nga kati i 3-të në katin e 5-të”, theksoi Llatja gjatë prononcimit të tij për gazetarët. Duke detajuar dinamikën e ngjarjes, ai shtoi se fillimisht është regjistruar një zjarr në katin e tretë, i cili më pas është përhapur. “Në momentin e shpërthimit ka pasur fillimisht një zjarr në katin e 3-të, i cili është përhapur. Kemi pasur, fatkeqësisht, një humbje jete, një grua 83-vjeçare, e cila ishte në katin e 5-të. Një 69-vjeçar akoma nuk është gjetur. Kemi pasur 10 persona që janë dërguar në spital për ndihmë dhe kontrolle mjekësore”, u shpreh ai. Në përfundim, kryebashkiaku vuri në dukje se dëmet materiale janë të konsiderueshme, duke e bërë një pjesë të ndërtesës të papërshtatshme për banim, ndërkohë që i gjithë objekti paraqet problematika serioze për sigurinë. “Njëri nga sektorët e pallatit është bërë i pabanueshëm dhe besojmë se do të jetë e pabanueshme një pjesë e pallatit, por i gjithë pallati paraqet probleme”, përfundoi Llatja.