Vushtrria bëhet gati për marsh paqësor: Nesër protestë në mbrojtje të ish-krerëve të UÇK-së

Dega e organizatave të dala nga lufta e Ushtrisë Çlirimtare të Kosovës në Vushtrri u ka bërë thirrje qytetarëve që t'i bashkohen protestës paqësore, e cila do të mbahet këtë të enjte, më 5 nëntor. Tubimi pritet të nisë në orën 12:00, në sheshin “Hasan Prishtina”, konkretisht te hapësira e parkimit pranë objektit të Komunës. Sipas komunikatës zyrtare, kjo revoltë popullore vjen si kundërpërgjigje ndaj Gjykatës Speciale dhe vendimeve të saj të fundit ndaj ish-udhëheqësve të UÇK-së. Organizatorët kanë kujtuar se kjo datë përkon me gjashtëvjetorin e ndalimit dhe dërgimit në paraburgim të Hashim Thaçit, Kadri Veselit, Jakup Krasniqit dhe Rexhep Selimit. Thirrja për pjesëmarrje masive u është drejtuar kategorive më të ndjeshme dhe të respektuara të shoqërisë, përfshirë familjarët e dëshmorëve, invalidët, veteranët, familjet e martirëve civilë, ish-të burgosurit politikë, si dhe gjithë banorët e Vushtrrisë që duan të kontribuojnë në këtë kauzë. Nëpërmjet këtij organizimi, nismëtarët synojnë të dëshmojnë mbështetjen e palëkundur për ish-krerët e UÇK-së, duke kërkuar njëkohësisht vendosjen e drejtësisë, ruajtjen e dinjitetit njerëzor dhe respektimin e vlerave të luftës sonë çlirimtare. Gjatë njoftimit janë shpërndarë edhe mesazhet mobilizuese “Jo në emrin tim” dhe “Liria ka emër”, të cilat do të jenë në fokus të këtij tubimi qytetar.