Shënoi golin e tretë dhe provokoi kundërshtarët, shpërtheu kaosi: 51 të përjashtuar!

Një përleshje masive në ndeshjen e kampionatit brazilian U-20 përfundoi me një numër të jashtëzakonshëm përjashtimesh. Gjithsej 51 persona u përjashtuan: 43 futbollistë dhe tetë anëtarë të shtabeve teknike. Ngjarja ndodhi në ndeshjen e parë gjysmëfinale të kategorisë së dytë të kampionatit shtetëror të Minas Gerais, ndërmjet Uberlandias dhe Mamores. Takimi u zhvillua të dielën në stadiumin Parque do Sabia, në qytetin Uberlandia, ku Mamore triumfoi me rezultat 3:1. Sipas mediumit brazilian “O Tempo”, ky rast tejkalon rekordin e njohur prej 36 futbollistësh të përjashtuar në një ndeshje, të vendosur në vitin 2011, në përballjen ndërmjet Claypole dhe Victoriano Arenas, në kategorinë e pestë të futbollit argjentinas. Festa e golit shkaktoi kaosin Skuadra mysafire nga Patos de Minas ishte në epërsi 3:1 kur, në minutën e 54-t të pjesës së dytë, në kohën shtesë të ndeshjes, situata doli jashtë kontrollit. Autori i golit të tretë, Davi Fernandes Bittencourt, gjatë festimit bëri gjeste provokuese në drejtim të bankinës së Uberlandias. Trajneri i portierëve të vendasve, Paulo Sergio Dias dos Santos, hyri në fushë dhe e shtyu futbollistin kundërshtar. Pas këtij veprimi shpërtheu një përleshje masive, ku u përfshinë futbollistë dhe pjesëtarë të shtabeve teknike të të dyja skuadrave. Në raportin e gjyqtarit Fernando Patrick Drosghic Modesto thuhet se në përleshje morën pjesë edhe gjashtë mbledhës të topave, të cilët goditën, shkelmuan dhe hodhën sende në drejtim të futbollistëve dhe pjesëtarëve të stafit të Mamorés. Gjatë kaosit u hodhën edhe barela dhe karrige. Për shkak të mungesës së sigurisë, gjyqtari nuk arriti t'ua tregonte zyrtarisht kartonët e kuq të gjithë futbollistëve të përjashtuar, por i regjistroi përjashtimet në raportin e ndeshjes. Të dy skuadrat mbetën pa trajnerë Uberlandia mbeti pa 22 futbollistë dhe katër anëtarë të stafit teknik, përfshirë trajnerin Marcelo Augusto Ferreira.Në anën tjetër, Mamore humbi 21 futbollistë dhe katër pjesëtarë të stafit, përfshirë trajnerin Quintino Mariz de Oliveira Filho. Ndeshja ishte ndërprerë edhe më herët për rreth 40 minuta, pasi drejtuesit e Uberlandias kishin hyrë në fushë për të protestuar ndaj përjashtimit të një futbollisti vendas. Policia ushtarake mbërriti pas incidentit, por nuk pati arrestime. Ndërkohë, administratori i stadiumit raportoi se delegacioni i Mamores kishte shkaktuar dëme në zhveshtoren e skuadrës. Policia konstatoi 14 dyer të dëmtuara, si dhe dëmtime në lavamanë, dushe, instalime elektrike dhe dy vaska me hidromasazh. Mamore kërkon përjashtimin e Uberlandias nga gara Nënkryetari i Mamores, Edson Reis, deklaroi se klubi nuk e mbështet dhunën, por përgjegjësinë për incidentin ia atribuoi organizimit të dobët të sigurisë. Ai pretendoi se futbollistët e skuadrës së tij ishin detyruar të mbroheshin. Mamore i ka kërkuar federatës që Uberlandia të përjashtohet nga gara dhe përgjigjen e pret deri të premten.Në rast se kërkesa nuk pranohet, Mamore planifikon ta zhvillojë ndeshjen e kthimit në Patos de Minas me futbollistët që do t'i ketë në dispozicion. Aktualisht, klubi ka vetëm 11 futbollistë të regjistruar që nuk janë përjashtuar. Për ndeshjen e kthimit, Mamoré ka paralajmëruar angazhimin e një kompanie private të sigurisë dhe ka kërkuar praninë e shtuar të policisë ushtarake. Një ndeshje futbolli që duhej të përcaktonte finalistët e garës përfundoi në një incident të jashtëzakonshëm, me dhjetëra të përjashtuar, përleshje masive dhe dëme të konsiderueshme materiale.