Gjendja e Erion Veliajt në burgun e Fierit, flet avokati Plarent Ndreca: Pritet ende ekzaminimi mjekësor

Plarent Ndreca, avokati mbrojtës i kryebashkiakut të Tiranës, Erion Veliaj, ka ndarë detaje të reja pas vizitës që i ka bërë klientit të tij në ambientet spitalore të burgut të Fierit, ku ky i fundit po mbahet për shkak të një frakture në gjymtyrë dhe nevojës për kujdes shëndetësor. Gjatë prononcimit për mediat pas këtij takimi, mbrojtësi ligjor ka shprehur shqetësimin mbi zvarritjen e ekzaminimeve mjekësore. Sipas tij, ndonëse kërkesa zyrtare është dorëzuar para afro dy javësh, ende nuk është mundësuar vlerësimi i gjendjes dhe ecurisë së rikuperimit të këmbës së dëmtuar të Veliajt. “Erioni është transferuar në ambientet spitalore të burgut të Fierit, për shkak të këmbës së thyer, e cila kërkon ende rikuperim dhe trajtim mjekësor. Ndërkohë, po bëhen gati dy javë që kemi kërkuar zyrtarisht kryerjen e ekzaminimit të nevojshëm për të vlerësuar ecurinë e konsolidimit të frakturës. Deri më sot, ky ekzaminim nuk është realizuar, pavarësisht kërkesave dhe udhëzimeve të mjekut që ndjek rikuperimin e tij”, theksoi Ndreca në deklaratën e tij. Po ashtu, avokati bëri me dije se gjatë takimit, kryebashkiaku i ka dorëzuar disa faqe nga ditar personal. Në to, ai ka pasqyruar qëndrimet dhe përgjigjet e dhëna për Ministrin e Drejtësisë lidhur me pretendimet dhe kërkesat e drejtuara ndaj tij, materiale të cilat pritet të bëhen publike së shpejti. Kujtojmë se kreu i Bashkisë së Tiranës vijon të qëndrojë në sektorin e spitaleve të institucionit të ekzekutimit të vendimeve penale në Fier, ku po merr trajtimin e nevojshëm për dëmtimin e pësuar në këmbë.