Talenti i Bayernit thyen rekordin historik në Champions League dhe i përgjigjet kritikëve me festimin specifik

Goli i shënuar nga Karl në sfidën e mbrëmjes së së martës kundër skuadrës së njohur si “Rojiblancos” shënoi pikërisht realizimin e tij të pestë në karrierë brenda kompeticionit më prestigjues evropian, UEFA Champions League. Në moshën 18 vjeç e 254 ditë, sulmuesi i Bayern Munichut u shndërrua në futbollistin e katërt më të ri në histori që arrin shifrën e pesë golave në këtë turne. Para tij në këtë renditje ekskluzive qëndrojnë vetëm Lamine Yamal i Barcelonës (17 vjeç, 291 ditë), Kylian Mbappe i Real Madridit (18 vjeç, 120 ditë) dhe ikona e “Los Blancos”, Raul (18 vjeç, 162 ditë). Ky ishte realizimi i parë për Karlin në këtë edicion të Champions League, ndërkohë që katër të tjerët i kishte realizuar gjatë edicionit të kaluar, ku përfshihej edhe një gol me vlerë historike. Gjatë gjithë ndeshjeve zyrtare të sezonit 2026/27, talenti 18-vjeçar ka arritur të regjistrojë dy gola dhe dy asistime në 13 paraqitje. Menjëherë pas gjetjes së rrjetës, Karl u drejtua nga kamerat duke vënë të dyja duart te veshët dhe duke bërë gjestin e njohur “bla-bla”, një formë festimi që mori vëmendje të jashtëzakonshme nga mediat ndërkombëtare. Ky veprim u interpretua gjerësisht si një mesazh i qartë ndaj kritikëve, ku në teori mund t'i drejtohej – ndër të tjera – edhe presidentit të nderit dhe njërës prej figurave kryesore të klubit bavarez, Uli Hoeneß. Ishte pikërisht Hoeneß ai që nxiti tensionin e fundit rreth lojtarit të ri. Në një prononcim dhënë për gazetën “Welt am Sonntag”, Hoeneß deklaroi hapur: “Kam vendosur të zhvilloj një bisedë serioze me të.” Ai shtoi se Karl ndodhet “larg së qenit një superyll dhe se lojtarët e rinj kanë nevojë për përulësi. Krahasimet me Olisen nuk i sjellin asnjë lloj dobie; ata ende ndahen nga një distancë e madhe”. Më tej, zyrtari i lartë i klubit vuri në dukje se talnet e rinj kërkojnë presion. “Për shembull, nuk jam i sigurt nëse i shërben për mirë Lennart Karl-it fakti që njerëzit vazhdimisht e përqafojnë pa kushte”, u shpreh ai. Në krahun tjetër, lojtari mori mbrojtje dhe mbështetje publike nga kapiteni dhe shoku i skuadrës, Manuel Neuer. Pas përfundimit të takimit triumfues ndaj Atletikos, Neuer u shpreh për “DAZN” se opinion publik nuk duhet t'i japë situatës më shumë peshë se ç’duhet. “Lenny përfaqëson një element kyç për grupin tonë. Ai është pjesë e jona dhe ne jemi jashtëzakonisht të gëzuar për të. Ne i dëshirojmë gjithmonë paraqitje fantastike, të cilat ai i konfirmoi edhe sot në fushë”, u shpreh portieri 40-vjeçar, duke shtuar se “nuk ekziston asnjë arsye për diskutim dhe as për ta shndërruar në një çështje të madhe”.