Kriza dhe sfida e madhe: Teuta fokusohet e gjitha te përballja me Tiranën

Teuta ka nisur zyrtarisht përgatitjet intensive për sfidën e radhës në kuadër të “Abissnet Superiore”, ku këtë të shtunë do të udhëtojë drejt kryeqytetit për t'u matur me Tiranën në stadiumin “Selman Stërmasi”. Pas dy rezultateve negative rresht në kampionat, skuadra durrsake kërkon me çdo kusht kthesën. Një triumf i mundshëm jashtë fushe do t'i rikthte sërish në luftën e afërt për kreun, duke ngushtuar diferencën me Egnatian kryesuese, e cila momentalisht është shkëputur në kuotën e katër pikëve. Kjo përballje përbën provën e fundit për “Djemtë e Detit” para ndërprerjes së kampionatit për shkak të angazhimeve të kombëtareve, ndërsa një rezultat pozitiv do të shërbente për të ulur tensionin dhe për të qetësuar ambientin rreth klubit. Duke parë edhe hapat e gabuar që rrogozhinasit e Egnatias bënë javë më parë, durrsakët janë të ndërgjegjësuar për rëndësinë e këtij momenti. Për këtë arsye, misioni i vetëm mbetet marrja e tri pikëve të plota nga kjo transfertë tejet e vështirë.