Tronditet Elbasani: Shpërthim i fortë në një banesë, shemben muret dhe shkallët e pallatit

Një ngjarje e rëndë ka tronditur qytetin e Elbasanit, ku një shpërthim i fuqishëm ka tronditur një apartament, duke lënë pas dëme materiale të jashtëzakonshme në gjithë strukturën e ndërtesës. Fuqia e shpërthimit ka qenë aq e madhe sa ka sjellë shembjen e mureve të banesës në fjalë, si dhe ka dëmtuar rëndë shkallët e pallatit, duke bllokuar lëvizjen normale në brendësi të tij. Sipas informacioneve të siguruara nga korrespondentja Bruna Kërçyku, autoritetet kanë nisur menjëherë evakuimin urgjent të të gjithë banorëve që nditeshin në pallat. Ekipet e zjarrfikësve kanë mbërritur pa humbur kohë në vendin e ngjarjes dhe po punojnë intensivisht për të nxjerrë banorët e bllokuar, duke përdorur ndërhyrjen përmes shkallëve të ndërtesës. Në raportimet paraprake dyshohet për persona të lënduar, ndërkohë që autoritetet ende nuk kanë dalë me një njoftim zyrtar për të konfirmuar numrin e saktë apo gjendjen shëndetësore të tyre. Operacionet e shpëtimit dhe të emergjencës janë ende duke vazhduar në terren, ndërsa pritet që në vijim të zbardhen shkaqet e sakta të këtij shpërthimi dhe pasojat e plota.