Operacioni “Rikthimi” trondit rrjetin e drogës: Sekuestrohen 37 kg heroinë gjysmëmilionëshe, pranga pesë personave

Një operacion i gjerë i koduar “Rikthimi”, i ndërmarrë bashkërisht nga Prokuroria Speciale, Policia e Kosovës dhe Agjencia e Kosovës për Inteligjencë (AKI), on ka rezultuar me konfiskimin e mbi 37 kilogramëve të substancës së dyshuar narkotike të llojit heroinë, vlera e së cilës kap shifrën rreth 550 mijë euro. Gjatë këtij aksioni, vihet re se janë vënë në pranga pesë persona të dyshuar, ku dy prej tyre janë shtetas të Turqisë. Ndërhyrja policore u kurorëzua pas hetimeve intensive të zhvilluara nga organet e sigurisë, të cilat gjatë aksionit ushtruan kontrolle në pesë lokacione të ndryshme. Përveç lëndës narkotike, autoritetet bënë të ditur se kanë sekuestruar edhe para të gatshme, pajisje të destinuara për presimin e drogës, një automjet, telefona celularë, si dhe prova të tjera materiale me rëndësi për hetimin. Në një konferencë të jashtëzakonshme për shtyp, UD. Kryeprokurori i Prokurorisë Speciale, Dren Paca, theksoi se ky sukses është arritur brenda një afati rekord kohor falë informacioneve të siguruara nga AKI-ja dhe bashkëpunimit profesional mes institucioneve. “Mbrëmë Prokuroria Speciale në bashkëpunim me Policinë e Kosovës, përkatësisht Drejtorinë për Hetimin e Trafikimit me Narkotikë dhe Agjencinë e Kosovës për Inteligjencë, ka realizuar me sukses një aksion gjatë të cilit janë arrestuar pesë persona, dy prej të cilëve shtetas të huaj. Dhe njëkohësisht janë sekuestruar mbi 37 kilogramë substancë e dyshuar narkotike e llojit heroinë. Ky aksion është rezultat i një hetimi të filluar së fundmi mbi bazën e informacioneve të siguruara nga Agjencia e Kosovës për Inteligjencë, falë profesionalizmit dhe bashkëpunimit të ndërsjellë. Hetimi është konkretizuar me këtë rezultat brenda një afati rekord. Për këtë dua të falënderoj veçanërisht të gjithë të angazhuarit në këtë aksion, të cilët me profesionalizëm dhe me përgjegjësi kanë ruajtur konfidencialitetin e hetimit, çka ishte kyçe për suksesin e këtij aksioni. Prokuroria Speciale do të luftojë pa kompromis krimin e organizuar dhe trafikimin e narkotikëve, pavarësisht se kush qëndron prapa tyre. Në këtë përballje, prokurorët dhe hetuesit do të kenë mbështetjen time të plotë për zbatimin e ligjit dhe vënien para përgjegjësisë”, u shpreh Paca. Ndërkohë, prokurori i çështjes, Atdhe Dema, shtoi se sasia e saktë do të konfirmohet përfundimisht pas ekzaminimeve laboratorike, ndërsa bëri të ditur se bëhet fjalë për një strukturë të mirëorganizuar kriminale. “Si rezultat i veprimeve dhe hetimeve të ndërmarra, ashtu siç u cek, janë arrestuar pesë persona dhe është sekuestruar, e konfiskuar sasi 37 kilogramë, në vlerë prej 550 000 euro. Sasia e saktë e llojit të substancës do të konfirmohet pas verifikimeve të cilat do të bëhen dhe analizave të duhura. Megjithatë, dyshimi i parë është se bëhet fjalë për substanca narkotike, dhe atëherë të llojit heroinë. Bëhet fjalë për grup mirë të organizuar, si strukturë kriminale, dhe e cila lidhet me veprën penale të blerjes, shpërndarjes narkotikëve. Ndaj të dyshuarve, veçse është shqiptuar vendimi me ndalim prej 48 orëve dhe për këtë moment që flas me ju, jemi në fazën e përgatitjes së gjithë dokumentacionit të cilin e kërkon procedura penale që të vazhdohet tutje me procedurë”, deklaroi Dema. Detaje shtesë rreth mënyrës së operimit të këtij grupi dhe dinamikës së hetimeve i ndau Reshat Murseli nga Drejtoria për Hetimin e Narkotikëve brenda Policisë së Kosovës, i cili konfirmoi se ndjekja e kësaj organizate kriminale kishte nisur kohë më parë në bashkërendim të ngushtë me PSRK-në dhe AKI-në.