Barcola thotë fjalët e mëdha pas nisjes së vështirë te Liverpooli: S’jam këtu për të qenë Salah i ri

Sulmuesi francez Bradley Barcola ka thyer heshtjen lidhur me nisjen e tij jo edhe aq të lehtë në futbollin anglez, duke bërë të qartë se nuk ndien peshën e zëvendësimit të Mohamed Salahut, i cili u largua nga radhët e klubit nga “Anfield” gjatë afatit kalimtar të verës. Barcola u bashkua me Liverpoolin nga Paris Saint-Germaini për një shifër prej 125 milionë eurosh, lëvizje kjo që u pa nga opinionin sportiv si një përpjekje për të gjetur pasardhësin e egjiptianit, i cili për plot nëntë sezone ishte shtylla kryesore e skuadrës angleze. Pavarësisht këtij çmimi rekord dhe pritshmërive të larta, 24-vjeçari ende nuk ka shijuar golin e tij të parë në shtatë paraqitjet e para në kuadër të Premierligës. Megjithatë, lojtari insiston se nuk e ka mendjen te shifra e transferimit e as te paralelizmat e vazhdueshme me yllin e shkuar të ekipit. “Së pari, nuk isha unë ai që caktoi vlerën e kartonit tim, ndaj kjo barrë nuk më takon mua. Sa i takon Mohamed Salahut, ai mbetet një legjendë e gjallë e këtij institucioni. Ka arritur rekorde të jashtëzakonshme dhe gëzon respektin tim maksimal. Megjithatë, e gjithë kjo nuk përbën ndonjë ngarkesë psikologjike për mua”, u shpreh Barcola. “Unë jam Bradley Barcola dhe jo Mohamed Salah. Synimi im është të ndihmoj skuadrën dhe të gdhend emrin tim në historinë e këtij klubi. Nuk kam asnjë lloj ankthi nga krahasimet”, shtoi ai në një intervistë për “Sky Sports”. Sulmuesi nga Franca, i cili ishte në shënjestrën e drejtuesve të Liverpoolit për më shumë se dymbëdhjetë muaj, pranon hapur se ende nuk e ka shfaqur maksimumin e aftësive të tij në fushën e blertë. Edhe pse ka pasur ngecje në përshtatjen me ritmin e Premierligës, ai kujton se ka dhënë shenja pozitive, siç ishte het-triku i realizuar kundër skuadrës austriake LASK në Ligën e Kampionëve muajin e kaluar, si dhe dy asistimet e para me fanellën e re. Në kampin e Liverpoolit besojnë se me kalimin e javëve dhe konsolidimin e lidhjeve mes lojtarëve, forma e tij do të vijë duke u ngritur në nivelet e pratura. “Nuk kam arritur ende në formën time ideale. Publiku nuk e ka parë ende versionin e vërtetë të Bradley Barcolas. Po punojmë intensivisht me grupin që shokët e ekipit t'i nxjerrin në pah pikat e mia të forta”, u shpreh ai. “Jam i bindur se, sapo të arrijmë një kimti më të lartë në fushë, gjërat do të marrin drejtimin e duhur. Çdo ditë po përmirësohemi dhe bashkëlojtarët po ambientohen gjithnjë e më shumë me stilin tim të lojës”, përfundoi sulmuesi francez.