Eurodeputeti Terras: Ngërçi politik i la Kosovës 18 muaj ngecje në rrugën e reformave

Raportuesi për Kosovën në Parlamentin Evropian, Riho Terras, ka dhënë vlerësimin e tij lidhur me zhvillimet e fundit politike dhe diplomatike në vend, gjatë një fjalimi të mbajtur në mbledhjen e Komitetit për Punë të Jashtme. Në këtë takim, ku komisionerja për Zgjerim, Marta Kos, solli në vëmendje raportin përkatës, eurodeputeti Terras theksoi se bllokada institucionale ka lënë pasoja të rënda në procesin e zhvillimit dhe të reformave. "Sipas vlerësimit tim fillestar, raporti i Komisionit Evropian për zgjerimin, që ka të bëjë me Kosovën, është mjaft i përshtatshëm. Ai pasqyron qartë fushat problematike të cilat u theksuan edhe në raportin e Parlamentit Evropian vitin e kaluar. Reformat dhe përparimi kanë ngecur, kryesisht për shkak të bllokadës politike, e cila në thelb i ka kushtuar Kosovës një vit e gjysmë të humbur", u shpreh ai. Megjithatë, Terras vuri në pah se rrethanat kanë ndryshuar për mirë, pasi vendi ka arritur të konstituojë institucionet e veta në përputhje të plotë me Kushtetutën, duke bërë që Kosova të ketë tashmë një Kuvend, një qeveri dhe një presidencë funksionale, zhvillim ky që sipas tij rrit pritshmëritë për stabilitet. "Sot situata është përmirësuar dhe Kosova ka arritur të zgjedhë e të vërë në funksion institucionet e saj, në përputhje me kushtetutën. Ajo tashmë ka një Kuvend, qeveri dhe president funksionalë. Kjo shton shpresat për një stabilitet më të madh – diçka për të cilën vendi ka nevojë urgjente", deklaroi eurodeputeti. Në fjalën e tij, ai vuri theksin te rëndësia e qëndrueshmërisë politike si çelës për të rikthyer ritmin e reformave, duke bërë thirrje gjithashtu për një qasje më aktive nga ana e Bashkimit Evropian ndaj Kosovës. "Stabiliteti politik është thelbësor për të krijuar vrullin e nevojshëm për zbatimin e reformave. Shpresoj vërtet se, pas kësaj bllokade, Komisioni Evropian do të angazhohet në mënyrë aktive për të mbështetur Kosovën, duke e trajtuar atë si partner të barabartë. Duhet ta rinisim dialogun Prishtinë-Beograd", përfundoi Terras, duke shtuar nevojën e bashkëpunimit me shtetet anëtare të BE-së që ende nuk e kanë njohur pavarësinë e vendit.