Hetimet për Arlinda Zekajn: Prokuroria Speciale konfirmon pranimin e dosjes

Gjatë një konference për media të mbajtur këtë të martë, e cila u fokusua te lufta kundër trafikimit të narkotikëve, Prokuroria Speciale është pyetur nga gazetarët lidhur me juridiksionin e saj në rastin e Arlinda Zekajt. Ushtruesi i detyrës së prokurorit në këtë institucion, Dren Paca, bëri të ditur se lënda në fjalë u është dorëzuar para tri ditësh. Sipas shpjegimeve të dhëna nga Paca, materiali hetimor po analizohet me kujdes të veçantë, sidomos në aspektin e përfshirjes së mundshme të zyrtarëve policorë dhe prokurorëve në këtë ngjarje. “Mund ta konfirmoj se Prokuroria Speciale ka pranuar para tri ditësh dosjen, nën dyshimet se, sa i përket zyrtarëve policorë që mund të jenë të dyshuar dhe ka ndodhur si pasojë e rastit, po e ka në shqyrtim, por vetëm sa i përket zyrtarëve policorë dhe prokurorëve që mund të jenë të përfshirë në rast. Të tjerët janë duke u trajtuar nga Prokuroria Themelore në Prishtinë”, deklaroi Paca gjatë konferencës. Ndërkohë, pjesa tjetër e këtij rasti vijon të mbetet nën kompetencat e Prokurorisë Themelore në Prishtinë, e cila po merret me hetimin e segmenteve të tjera të ngjarjes.