Goditet rrjeti i trafikut të drogës në kuadër të operacionit “Rikthimi”, kapen mbi 37 kilogramë heroinë dhe pesë të dyshuar

Prokuroria Speciale e Republikës së Kosovës, në bashkëordinim të ngushtë me Policinë e Kosovës dhe Agjencinë e Kosovës për Inteligjencë (AKI), ka ndërmarrë një aksion të gjerë kundër krimit të organizuar, i cili ka rezultuar me sekuestrimin e më shumë se 37 kilogramëve substancë të dyshuar narkotike të llojit heroinë. Ky operacion, i pagëzuar me emrin e koduar “Rikthimi”, ka nisur fillimisht me kontrolle intensive në një depo të vendosur në rajonin e Ferizajt, për t'u shtrirë më pas në katër lokacione të ndryshme, ku dy prej tyre janë kontrolluar në zonën e Prishtinës. Gjatë një konference për media, ushtruesi i detyrës së kryeprokurorit të Prokurorisë Speciale, Dren Paca, konfirmoi se në kuadër të këtij aksioni janë vënë në pranga pesë persona të dyshuar si pjesë e këtij rrjeti kriminal. Të arrestuarit i përkasin kombësive të ndryshme, ku dy prej tyre janë shtetas të Turqisë, njëri shtetas i Maqedonisë së Veriut, ndërsa dy të tjerët janë shtetas të Republikës së Kosovës. Krahas sasisë së konsiderueshme të lëndës narkotike, autoritetet e rendit kanë sekuestruar edhe pesë mijë euro në gatishmëri, një automjet, dhjetë aparate telefonike, pajisjen regjistruese të kamerave (DVR), si dhe disa copë fishekë.