Zyrtare: Ludovic Magnin merr sërish drejtimin e skuadrës së Lausanne-Sport

Klubi elitar zviceran, FC Lausanne-Sport, ka zyrtarizuar emërimin e trajnerit të ri, duke i besuar pankinës së skuadrës së parë një emër të njohur për opinionin sportiv. Lajmi është bërë i ditur drejtpërdrejt përmes faqes zyrtare të klubit nga Zvicra, ku është konfirmuar kthimi i teknikut në krye të skuadrës. “Ludovic Magnin rikthehet te FC Lausanne-Sport! FC Lausanne-Sport njofton emërimin e Ludovic Magnin në postin e trajnerit të ekipit të parë”, thuhet në komunikatën zyrtare të klubit. Strategu zviceran, i cili vjen nga kantoni i Vaud-it, ka vendosur firmën e tij në një marrëveshje afatgjate, e cila do ta mbajë të lidhur me fanellën e klubit deri më 30 qershor 2028. Në njoftimin e lëshuar nga FC Lausanne-Sport, drejtuesit i kanë shprehur urimet më të ngrohta për një rikthim të suksesshëm në stadiumin ‘Stade de la Tuiliere’, duke vënë theksin te objektivi kryesor i këtij sezoni: sigurimi i mbijetesës në Superligë përmes një angazhimi të përbashkët.