Talenti shqiptar Alen Vukaj shkëlqen me gol në UEFA Youth League, por Interi pëson humbje në Holandë

Paraqitja e shkëlqyer e futbollistit shqiptar Alen Vukaj nuk ka mjaftuar që skuadra e Interit U-19 të sigurojë një rezultat pozitiv nga transferta e vështirë në Roterdam. Zikaltrit e rinj janë mposhtur me rezultatin 3:1 nga moshatarët e Feyenoordit, në takimin e vlefshëm për fazën e grupeve të UEFA Youth League. Talenti shqiptar la gjurmë në këtë sfidë duke gjetur rrugën e rrjetës në minutën e 20-të, duke barazuar shifrat në 1:1. Vukaj ishte protagonist në fushë, ku u aktivizua për 80 minuta lojë. Ndërkohë, triumfi i skuadrës holandeze u vulos nga golat e Haps, i cili realizoi në minutën e 4-t dhe përsëri në të 86-tën, si dhe nga El Harmouz, i cili shënoi në minutën e 32-të të takimit. Pas përfundimit të katër xhirove të para, Feyenoord vazhdon dominimin në krye të tabelës me 12 pikë të grumbulluara, ndërsa Interi pozicionohet në vendin e 24-t me vetëm 4 pikë në llogarinë e tij.