Turqi: Goditja brutale me shuplakë në mes të rrugës i shkakton gruas humbje të përhershme të dëgjimit, arrestohet 38-vjeçari

Një ngjarje e rëndë ka tronditur Turqinë, ku një sulm fizik ndaj një kalimtareje ka lënë pas pasoja të pariparueshme për shëndetin e saj. Autoritetet policore në qytetin e Nevşehirit kanë vënë në pranga një 38-vjeçar, pasi ky i fundit dyshohet se qëlloi me forcë me shuplakë në vesh një femër pranë hyrjes së një supermarketi, duke i shkaktuar asaj humbje të përhershme të dëgjimit në veshin e majtë. Episodi i dhunës u shënua në lagjen Kapucubaşı. Sipas hetimeve paraprake, i dyshuari Tolga Çelik i është afruar fshehurazi nga mbrapa gruas me inicialet S.E., duke e goditur papritur në zonën e kokës. I gjithë akti i shëmtuar është kapur qartësisht nga lente e kamerave të sigurisë të bizneseve përreth. E tronditur nga sulmi, viktima është paraqitur menjëherë në komisariat për të bërë denoncimin zyrtar. Gjatë procesit të pyetjes nga organet e rendit, Çelik është munduar të mbrohet duke hedhur posht akuzat, me pretendimin se ngjarja ka qenë thjesht një incident dhe se goditja e pretenduar ka ndodhur nga një kontakt i pavullnetshëm i krahut të tij. Megjithatë, ekspertiza mjeko-ligjore hodhi poshtë versionin e të dyshuarit, duke konfirmuar se gruaja kishte pësuar një dëmtim të rëndë që i kishte marrë dëgjimin në veshin e majtë. Raporti i mjekëve dëshmoi se plagët e shkaktuara nuk mund të riparohen përmes trajtimeve mjekësore standarde, pavarësisht se fatmirësisht nuk përbënin kërcënim për jetën e saj. Në përfundim të veprimeve të para hetimore, policia e ka dorëzuar dosjen pranë autoriteteve gjyqësore. Gjykata ka shpallur masën e sigurisë "Arrest me burg" për 38-vjeçarin, i cili është transferuar në institucionin e ekzekutimit të vendimeve penale, ndërkohë që pamjet filmike mbeten prova kryesore e krimit.