Kombëtarja e Kosovës në hendboll përmbyll përgatitjet, synon befasinë ndaj Ishujve Faroe

Përfaqësuesja e Kosovës në hendboll po zhvillon seancat e fundit stërvitore në prag të sfidës inauguruese në kuadër të fazës kualifikuese për Kampionatin Evropian 2028. Delegacioni kosovar ka udhëtuar drejt kryeqytetit Torshavn që prej ditës së hënë, ndërsa dueli ndaj Ishujve Faroe është caktuar të zhvillohet të mërkurën, me fillim nga ora 20:00. Kosova bën pjesë në Grupin 4, nën shoqërinë e Hungarisë dhe Malit të Zi. Rregullorja parashikon që dy pozitat e para sigurojnë biletën direkte për në Evropian, kurse në garë janë edhe katër Përfaqësueset më të suksesshme nga vendet e treta të të gjitha grupeve. Pavarësisht se vendasit konsiderohen si favoritë në letër, kampi dardan shfaq unitet, përkushtim maksimal dhe gatishmëri për të treguar paraqitje dinjitoze në fushë. Për shkak të paraqitjeve të mëparshme në këtë stadium, lojtarët tanë e njohin mirë ambientin dhe atmosferën e zjarrtë që i pret në Torshavn. Eksperienca e fituar nga përballjet e kaluara me këtë kundërshtar vlerësohet si një armë shtesë për djemtë tanë para sfidës së së mërkurës në mbrëmje. Selektori Jesper Ostlund ka kompletuar grupin e lojtarëve të ftuar për këtë transfertë, ndërkohë që në këtë aksion duhet theksuar mungesa e kapitenit Valon Dedaj dhe e Leonard Gegajt. Pas këtij angazhimi, Përfaqësuesja jonë do të kthehet menjëherë në vend për të luajtur ndeshjen e radhës kundër Hungarisë, e cila do të zhvillohet të dielën në qytetin e Ferizajt.