Tragjedia në Spanjë trondit sportin botëror: Granit Xhaka, Mbappe dhe Nadal përcjellin mesazhet prekëse

Bota e sportit është përfshirë nga zia pas ndarjes së parakohshme nga vida të sulmuesit të Tenerifes, Jesus de Miguel, i cili ndërroi jetë në moshën 30-vjeçare pas një përplasjeje të rëndë gjatë ndeshjes kundër FC Andorrës në kategorinë e dytë spanjolle. Humbja e tij tragjike ka lënë pas një boshllëk të madh dhe ka nxitur valë reagimesh solidariteti nga mbarë opinioni sportiv. Kapiteni i Zvicrës dhe i Sunderlandit, futbollisti me origjinë nga Kosova Granit Xhaka, ka qenë ndër të parët që ka reaguar, duke lënë një koment me simbolin e duarve të bashkuara në postimin zyrtar të klubit CD Tenerife në Instagram. Krahas tij, ylli i Real Madridit, Kylian Mbappe, ka ndarë dhimbjen e tij përmes një fotografie në Instagram, duke shkruar: «Dhimbje e madhe. Nuk kam fjalë». Tragjedia ka kapërcyer kufijtë e futbollit, duke prekur edhe legjendën e tenisit spanjoll, Rafael Nadal. Përmes një postimi në rrjetet sociale, ish-tenisti u shpreh: “Çfarë humbjeje e madhe... Ngushëllimet e mia dhe një përqafim shumë i fortë për familjen dhe miqtë e Jesús de Miguelit në këto momente të vështira. Jam me gjithë zemër pranë jush”. Klubet e mëdha, përfshirë Real Madridin që mbajti një minutë heshtje para stërvitjes, si dhe Barcelona përmes një mesazhi ngushëllimi, kanë shprehur hidhërimin e thellë për këtë ngjarje. Po ashtu, FC Andorra, skuadra e cila ishte palë në ndeshjen fatale, u bashkua me dhimbjen e familjes. Presidenti i këtij klubi, ish-ylli i Barcelonës Gerard Pique (39), reagoi në platformën X me fjalët: “Më vjen jashtëzakonisht keq, nga thellësia e zemrës”. Si shenjë respekti dhe solidarizimi, Federata Spanjolle e Futbollit mori vendimin për të anuluar ndeshjet e Kupës së Mbretit për meshkuj dhe Kupës së Mbretëreshës për femra që ishin planifikuar për mbrëmjen e së martës. Ndërkohë, UEFA ka konfirmuar se përgjatë gjithë kësaj jave, në të gjitha ndeshjet e saj evropiane do të mbahet një minutë heshtje në nderim dhe kujtim të Jesus de Miguelit.