Bilanci i shëndetësisë në Kosovë për 2025: Mbi 3 mijë e 700 raste të reja me kancer, kryeson Prishtina

Gjatë periudhës janar-dhjetor të vitit 2025, në territorin e Kosovës janë regjistruar gjithsej 3 mijë e 775 raste të reja me sëmundje malinje, sipas të dhënave zyrtare të bëra publike nga Instituti Kombëtar i Shëndetësisë Publike përmes Raportit vjetor për sëmundjet malinje. Në bazë të këtij dokumenti statistikor, shpërndarja gjinore e të prekurve është relativisht e barabartë, ku gratë përbëjnë 51% të rasteve të reja, ndërsa burrat zënë 49% të totalit. Sa i përket strukturës moshore, raporti vë në pah se grupmosha më e rrezikuar dhe më e prekur nga këto patologji mbetet ajo mbi 60 vjeç. Analiza e llojeve të tumoreve tregon se te gjinia femërore mbizotërojnë rastet me kancer të gjirit dhe ato të organeve gjenitale, kurse te meshkujt më të pranishme janë format e kancerit të lëkurës, mushkërive dhe prostatës. Dokumenti zyrtar gjithashtu ofron shifra mbi numrin e përgjithshëm të personave që po përballen me sëmundje malinje gjatë vitit 2025 – përfshirë edhe pacientët e diagnostikuar në periudhat e mëparshme – shifër kjo që arrin në 5 mijë e 564 raste gjithsej. Nga IKSHPK është bërë e ditur se këto statistika janë përpiluar duke grumbulluar informacione nga të gjitha institucionet shëndetësore, si publike ashtu edhe private në vend, përmes Regjistrit Popullativ të Sëmundjeve Malinje. Në aspektin gjeografik, kryeqyteti i Kosovës, Prishtina, udhëheq me numrin më të lartë të rasteve të reja duke regjistruar 652 të tillë. Më tej radhitet Peja me 259 raste, Gjakova dhe Prizreni me nga 236 raste secila, Ferizaj me 209, Mitrovica me 188, Podujeva me 172, si dhe Vushtrria me 169 raste të reja.