Paketë e re mbështetjeje për studentët në Shqipëri: Rriten bursat deri në 25 mijë lekë dhe shtohet bonusstrehimi

Ministrja e Arsimit, Mirela Kumbaro, gjatë shqyrtimit të projektbuxhetit për vitin 2027 në Komisionin për Edukimin, Shkencën dhe Sportet, e ka cilësuar si fokus kryesor përkrahjen e studentëve. Ajo bëri të ditur se sektori i arsimit të lartë do të përfitojë shtesën më të madhe financiare brenda buxhetit vjetor të dikasterit që ajo drejton. Sipas ministres, ky vendim vjen si përgjigje ndaj kërkesave të institucioneve të arsimit të lartë dhe zërit të vetë studentëve, pas një dialogu të vazhdueshëm gjatë gjithë vitit dhe në kuadër të ndryshimeve në ligjin për arsimin e lartë. Buxheti i vitit 2027 sjell një shtesë prej 1,25 miliardë lekësh dedikuar posaçërisht paketës studentore, e cila përfshin ndihmë direkte për shtresat në nevojë, rritje të bursave dhe një bonus qiraje ose shtesë në pagesën mujore prej 25 000 lekësh të reja, krahasuar me 10 000 lekë që ishte më parë. Kumbaro nënvizoi se ky buxhet fuqizon ndjeshëm ndihmën financiare për të rinjtë, ndërsa risi e këtij viti është zgjerimi i skemës mbështetëse për degët prioritare edhe në ciklin e dytë të studimeve "Master", krahas investimeve për kushte më të mira në konvikte. Duke hyrë në detaje, ajo shpjegoi se bursa për studentët nga familjet në nevojë rritet nga 10 000 në 25 000 lekë në muaj (afërsisht 275 euro), duke u shtrirë për herë të parë edhe përgjatë periudhës së studimeve "Master". Në total, kjo skemë ndihme do të përfshijë mbi 11 500 studentë të ndarë në tri grupe kryesore. Konkretisht, 5 900 studentë nga familjet në nevojë do të përfitojnë nga 25 000 lekë në muaj; 5 500 studentë me mesatare 9–10 do të marrin 10 000 lekë; kurse 177 studentë të degëve me prioritet kombëtar do të mbështeten me 50 000 lekë në muaj, me mundësi përfitimi edhe gjatë ciklit "Master". Po ashtu, janë parashikuar 375 milionë lekë (rreth 4 milionë euro) si fonde grant për akomodimin në "Shoqëritë e Trajtimit të Studentëve" në Tiranë dhe qendra të tjera universitare. Kjo nismë garanton strehim për 7 000 deri në 7 500 studentë, ndërsa së bashku me të ardhurat nga tarifat dhe kontributet e pushtetit vendor, fondi total shkon në rreth 900 milionë lekë në vit (afërsisht 9,5 milionë euro), me qëllim modernizimin e kushteve të jetesës në konviktet e Tiranës, Kamzës, Vlorës, Korçës, Shkodrës, Elbasanit dhe Gjirokastrës.