Përplasje në Komisionin për Shëndetësi: Kërkohet llogari nga Vitia dhe SHSKUK për barnat dhe listat e pritjes

Komisioni Parlamentar për Shëndetësi ka miratuar gjatë mbledhjes së mbajtur të martën një kërkesë zyrtare që ministri i Shëndetësisë, Arben Vitia, dhe drejtori i SHSKUK-së të dorëzojnë brenda një afati prej dy javësh raporte me shkrim. Këto dokumente do të fokusohen te gjendja e listave të pritjes së pacientëve dhe te mbarëvajtja e furnizimit me barna nga lista esenciale. Pas shqyrtimit të këtyre materialeve, krerët e shëndetësisë pritet të ftohen për raportim fizik para komisionit gjatë muajit dhjetor. Megjithatë, kjo nismë ka prodhuar debate dhe tone të larta mes përfaqësuesve të pushtetit dhe atyre të opozitës. Kryetari i këtij komisioni, Uran Ismaili, ka insistuar në rëndësinë e llogaridhënies institucionale dhe respektimit të afateve kohore, ndërsa deputeti i Lëvizjes Vetëvendosje, Egzon Azemi, ka ngritur akuza se kjo çështje po shfrytëzohet për efekte politike. Duke arsyetuar vendimin, kryetari Ismaili bëri të ditur se kërkesa përfshihet në planifikimin e agjendës për dy muajt e fundit të vitit, me qëllim që të krijohet një pasqyrë sa më reale e gjendjes në këtë dikaster para mbylljes së sesionit vjetor dhe skicimit të planeve për vitin e ardhshëm. "Kemi të bëjmë vetëm me dy muaj çka ka mbet, dhjetori ka njëfarë përfundimi më të hershëm dhe kemi dashur që të kemi disa aktivitete për nëntor dhe dhjetor dhe ta shfrytëzojmë në një sesion që do të kishim pasur të bëjmë një planifikim për vitin e ardhshëm. Me na dërgua një raport me shkrim në listën e pritjes të klinikës së SHKUK-së dhe për raport me barna në listën esenciale. Kjo na jep njëlloj hapësire që të kemi një raportim të mundshëm gjatë muajit dhjetor, është e vlefshme ta kemi një raport. Do të ishte mirë në dhjetor ta kemi një raportim nga drejtori SHKUK-së dhe ministri i shëndetësisë para se ta mbyllim këtë vit", u shpreh Ismaili. Sakaq, ai u bëri thirrje kolegëve anëtarë të tregojnë vendosmëri në zbatimin e afateve, duke shprehur drojën se për shkak të ndarjeve partiake midis pozitës dhe opozitës, kërkesat e komisionit rrezikojnë të mos merren me seriozitetin e duhur nga ana e ekzekutivit. "Kërkoj nga gjithë ju që të jemi të vendosur që në raporte që po i kërkojmë që të na respektojnë afatet që po i dërgojmë, përpilimi i këtij raporti është jashtëzakonisht i lehtë. Nuk do të doja që të behej komisioni një lloj ping pongu që të mos merremi parasysh, për shkak se njerëzit gjejnë mbështetje politike në kuptimin opozitë-pozitë. Mendoj që raporti për listë esenciale dhe lista të pritjes janë kërkesa të vazhdueshme të qytetarëve. Kanë obligim që të na japin raporte sa më të shpejta në afat dy javorë", shtoi ai. Këto qëndrime kanë ngjitur menjëherë reagimin e deputetit të Lëvizjes Vetëvendosje, Egzon Azemi, i cili ka hedhur poshtë qasjen e kryetarit të komisionit, duke e vlerësuar atë si të ndikuar nga agjenda partiake dhe duke i përmendur të kaluarën e tij në krye të Ministrisë së Shëndetësisë. "Po fillon mbledhja me të njëjtën qasje që nuk doni të bëni politikë dhe për çdo herë po përfundon duke e bë të njëjtën, e kuptoj jeni subjekte opozitare. Nuk duhet të harroni se keni qenë ministër i shëndetësisë, nuk është se e kemi gjetur shëndetësinë në lule dhe u prish brenda natës, është ky sistem shëndetësorë të cilin e dimë që nuk është në gjendjen më të mirë të mundshme, le të flasim në një dozë më të lartë të sinqeritetit", deklaroi Azemi. Si kundërpërgjigje ndaj këtyre kritikave, Ismaili ka hedhur poshtë çdo pretendim se kërkesa për llogaridhënie ka prapavijë politike, duke nënvizuar se fokusi i vetëm mbetet marrja e përgjigjeve konkrete nga ministri dhe drejtori i SHSKUK-së për sfidat që prekin drejtpërdrejt shëndetin e qytetarëve.