Në fokus Brukseli: Kryeministri Rama merr pjesë në Samitin e Euronews dhe takon liderët e BE-së e NATO-s

Kryeministri Edi Rama ka udhëtuar këtë të martë drejt kryeqytetit evropian, Bruksel, ku do të jetë i pranishëm në punimet e Samitit të Euronews kushtuar procesit të zgjerimit të Bashkimit Evropian. Lajmi është konfirmuar zyrtarisht nga Kryeministria, e cila ka specifikuar se kreu i qeverisë shqiptare do të marrë pjesë në "Euronews Enlargement Summit". Ky aktivitet i rëndësishëm i nivelit të lartë shërben si një platformë diskutim për të ardhmen e zgjerimit të BE-së dhe horizontin evropian për vendet që synojnë anëtarësimin. Sipas njoftimit zyrtar, gjatë punimeve të këtij samiti, Rama do të zhvillojë një bashkëbisedim me përfaqësuesit e medias së njohur ndërkombëtare Euronews. Fokusi i kësaj interviste do të jetë progresi i deritanishëm i Shqipërisë në rrugën drejt integrimit, në një kohë kur vijojnë intensivisht përpjekjet dhe negociatat teknike për mbylljen e grupkapitujve të ardhshëm. Axhenda e kryeministrit në Bruksel do të përfshijë gjithashtu takime bilaterale me personalitete të larta të politikës ndërkombëtare, ku ai do të pritet në takime të veçanta nga Presidenti i Këshillit Evropian, António Costa, si dhe nga Sekretari i Përgjithshëm i NATO-s, Mark Rutte.