Trump paralajmëron amnisti totale për stafin e tij nëse opozita merr kontrollin e Kongresit

Kreu i Shteteve të Bashkuara, Donald Trump, ka bërë të tojnë se është plotësisht i gatshëm të ofrojë falje parandaluese për të gjithë ish-bashkëpunëtorët e tij qeveritarë, nëse demokratët arrijnë të sigurojnë shumicën në Kongres dhe ndërmarrin hapa për t'i ndjekur penalisht ata. Këto komente kreu i Shtëpisë së Bardhë i dha gjithë-përfshirëse gjatë një interviste për gazetaren Miranda Devine të New York Post, në kuadër të emisionit “Pod Force One”, teksa u pyet nëse do të përdorte autoritetin e tij presidencial për t'i dalë në krah stafit të tij. “Po, do ta bëja nëse do të ishte e nevojshme. Pa diskutim,” u përgjigj prerë Trump, ndërsa i pyetur mbi shtrirjen e këtij vendimi, ai konfirmoi se një hap i tillë do të përfshinte këdo që ka shërbyer në krah të tij, duke shtuar: “E bëra një gjë të tillë edhe për ngjarjet e 6 janarit”. Kujtojmë se gjatë ditës së tij të parë të rikthimit në pushtet në vitin 2025, ai lëshoi amnisti për afërsisht 1,500 individë që u përfshinë në trazirat e regjistruara më 6 janar 2021 në Kapitol. Gjatë kësaj bisede, presidenti amerikan solli në vëmendje edhe vendimin e paraardhësit të tij, Joe Biden, i cili në çastet e fundit të mandatit të tij fali ish-këshilltarin shëndetësor Anthony Fauci, gjeneralin Mark Milley, anëtarët e stafit të komisionit hetimor të Kongresit për ngjarjet e 6 janarit, si dhe disa pjesëtarë të familjes, përfshirë djalin e tij Hunter Biden. “Kjo është fiks ajo çfarë bëri Biden. Ai shpërndau falje për të gjithë,” u shpreh Trump, duke e etiketuar komisionin hetimor të 6 janarit si një organ të korruptuar. Reagimet e kreut të shtetit vijnë pas sinjaleve të dhëna nga disa figura të larta demokrate, të cilat kanë paralajmëruar nisjen e hetimeve dhe procedimeve ligjore ndaj personave që kanë mbështetur axhendën e administratës Trump. Senatorja demokrate Elissa Slotkin ka theksuar se një Kongres i udhëhequr nga demokratët duhet të ndjekë penalisht çështje kyçe kundër mbështetësve të presidentit, me qëllim krijimin e një efekti parandalues për këdo që mund të mendojë t'i bashkohet në të ardhmen një administrate të ngjashme. Në të njëjtën linjë ka qenë edhe Jamie Raskin, i cili parashikohet të marrë drejtimin e Komisionit të Drejtësisë në Dhomën e Përfaqësuesve nëse demokratët triumfojnë, duke paralajmëruar hetime ndaj asaj që ai e quan korrupsion sistemik brenda pushtetit ekzekutiv. I pyetur mbi mundësinë që shënjestër e demokratëve të bëhet edhe sipërmarrësi i njohur Elon Musk, Trump hodhi poshtë çdo skenar të tillë, duke e konsideruar si të pamundur. “Nuk ka për të ndodhur. Janë thjesht fjalë boshe. Megjithatë, nëse bëhet fjalë vetëm për retorikë, do të duhet t'i mbrojmë ata,” theksoi ai. Megjithatë, ekspertët kujtojnë se faljet presidenciale shtrihen vetëm te shkeljet e natyrës federale, duke mos ofruar asnjë lloj imuniteti ndaj hetimeve në nivel shtetëror, padive civile apo mekanizmave të shkarkimit nga detyra. I pyetur drejtpërdrejt nëse pret që ai vetë të jetë në fokusin e sulmeve të demokratëve, Trump u tregua i rezervuar: “Për veten time, nuk e di se çfarë do të ndodhë”. Në fund të bisedës, presidenti amerikan komentoi edhe sondazhet e fundit që favorizojnë demokratët për marrjen e kontrollit të Dhomës së Përfaqësuesve, duke i hedhur poshtë si të manipuluara dhe duke sugjeruar se realiteti në kutitë e votimit mund të jetë ndryshe. “Do ta kuptojmë qartë mbrëmjen e së martës,” përfundoi ai.