37-vjetori i rënies heroike të Afrim Zhitisë dhe Fahri Fazliut, Kurti: Sakrifica e tyre zgjoi vetëdijen kombëtare

Kryeministri i vendit, Albin Kurti, i shoqëruar nga presidentja Justina Shiroka Pula, ka zhvilluar homazhe pranë varreve të dëshmorëve të kombit, Afrim Zhitia dhe Fahri Fazliu, në kuadër të shënimit të 37-vjetorit të rënies së tyre në fushën e nderit. Nëpërmjet një shkrimi të shpërndarë në rrjetet sociale, kreu i ekzekutivit ka evokuar figurat dhe qëndresën e dy veprimtarëve të shquar, të cilët humbën jetën heroikisht më 1989, gjatë një lufte të armatosur kundër forcave serbo-jugosllave. “Në vitin 1989 i kishim Afrimin e Fahriun, e pesë vjet para tyre, në mes të viteve të 80-ta, e kishim Rexhep Malën e Nuhi Berishën. Ishin këto përballje në të cilat rënia heroike e veprimtarëve intelektualë dhe patriotëve idealistë, bëhej ngritje e vetëdijes dhe e organizimit të shqiptarëve. Ishte kjo dekada kur shqiptarët nën ish-Jugosllavi, përbënin 1/8 e popullsisë së gjithmbarshme, por rreth 80 për qind të të gjithë ish të burgosurve politikë ishin shqiptarë”, ka shkruar Kurti. Sipas shefit të Qeverisë, vepra e Afrim Zhitisë dhe Fahri Fazliut mishëron angazhimin e palëkundur për çlirimin e Kosovës, garantimin e lirisë qytetare dhe përparimin e përgjithshëm shoqëror. Në mesazhin e tij, Kurti ka vënë në pah se idealet e dëshmorëve nderohen më së miri përmes ndërtimit të një shteti të fortë, mbrojtjes së sovranitetit dhe integritetit territorial, si dhe përmes zhvillimit ekonomik e përkushtimit ndaj qytetarëve. “Duke lartësuar Republikën dhe kombin tonë, duke mbrojtur integritetin territorial, duke ruajtur sovranitetin shtetëror, duke rritur ekonominë dhe forcuar ushtrinë, duke ju shërbyer qytetarëve e shoqërisë, ne ju përmbahemi idealeve të dëshmorëve të kombit”, ka përfunduar Kurti.