Real Madridi triumfon bindshëm në udhëtim, Los Blancos nuk ndalen në garën për kreun e La Ligas

Real Madridi ka arkëtuar tri pikë të arta në kampionatin spanjoll, duke triumfuar si mysafir ndaj Racing Santanderit me shifrat e pastra 0-3, në kuadër të javës së 11-të. Skuadra madrilene e nisi ndeshjen në sulm dhe zhbllokoi shifrat që në minutën e 11-të, kur Kylian Mbappe u tregua i saktë nga pika e bardhë e penalltisë. Pak minuta më vonë, saktësisht në minutën e 21-të, Jude Bellingham dyfishoi epërsinë pas një asistimi fantastik të dhuruar nga Arda Guler. Spektakli i pjesës së parë u kurorëzua me një gol të jashtëzakonshëm nga Yan Diomande në minutën e 36-të. Ai lëshoi një predhë nga distanca, duke e dërguar topin në këndin e sipërm të portës dhe duke vulosur rezultatin e fraksionit të parë. Me të filluar pjesa e dytë, Mbappe i është afruar sërish golit, por fati i ka kthyer krahët kur goditja e tij u ndal nga shtylla e djathtë. Një nga momentet më të komentuara të sfidës ndodhi në minutën e 72-të, kur gjyqtari akordoi penallti për vendasit pas një prekjeje të topit me dorë nga Aurelien Tchouameni, por vendimi u përmbys pas konsultimit të sistemit VAR. Në minutat e fundit, madrilenët patën edhe raste të tjera shënimi. Goli i Jude Bellingham në minutën e 90+1-të u anulua për pozicion jashtë loje, ndërsa talenti Endrick lëshoi një mundësi të mirë duke gjuajtur ngjitur me shtyllën. Falë kësaj fitoreje radhase, Real Madridi ngjitet në kuotën e 27 pikëve, duke mbetur ngushtë pas Atleticos që ka 28 dhe liderit Barcelona që numëron 30 pikë në renditjen tabelore.