Ujdi paqeje mes Rusisë dhe Ukrainës? Trump shprehet optimist: Jemi shumë pranë zgjidhjes së konfliktit

Kreu i Shtëpisë së Bardhë, Donald Trump, ka dhënë sinjale të forta optimizmi lidhur me mundësinë e arritjes së një pajtimi paqësor ndërmjet Rusisë dhe Ukrainës. Sipas tij, palët ndërluftuese mund të jenë mjaft afër gjetjes së një zgjidhjeje përfundimtare. Gjatë një bashkëbisedimi me komentatorin konservator Benny Johnson, të publikuar të shtunën, udhëheqësi amerikan nëvizoi se ekziston një mundësi mjaft e mirë për përmbylljen e luftës. "Unë mendoj se po i afrohemi shumë arritjes së një marrëveshjeje", deklaroi Trump, duke iu referuar raporteve mjaft të tensuara dhe armiqësisë së thellë mes presidentit rus Vladimir Putin dhe atij ukrainas Volodymyr Zelenskyy. I pyetur mbi gjasat që kjo marrëveshje të arrihet gjatë samitit të G20-ës, i cili parashikohet të mbahet në dhjetor në resortin e tij "Trump National Doral" në Florida, ai nuk e ka përjashtuar një mundësi të tillë. "Mendoj se ka shumë mundësi që ta zgjidhim këtë çështje. Gjithashtu, po punojmë edhe për shumë marrëveshje të tjera", u shpreh më tej ai. Përveç krizës ukrainase, gjatë kësaj interviste Trump u ndal edhe te Irani, duke rikonfirmuar qëndrimin e prerë të administratës së tij kundër pajisjes së këtij shteti me armatim bërthamor. Ai pretendoi se kapacitetet ushtarake të Teheranit janë dobësuar ndjeshëm, duke shtuar se Shtetet e Bashkuara janë të vendosura për ta përmbyllur këtë çështje. Sidoqoftë, deklaratat e Trumpit deri më tani nuk shoqërohen me ndonjë ujdi të konfirmuar zyrtarisht mes Moskës dhe Kievit, ndërsa mbetet për t'u parë se sa rezultate konkrete do të prodhojnë bisedimet e ardhshme.