Detajet intime: Dua Lipa tregon simbolet e fshehura në fustanin e saj të dasmës

Ylli i muzikës pop, Dua Lipa, ka ndarë me publikun detaje të reja nga dita e saj më e veçantë, duke zbuluar se fustani i dasmës përmbante detaje unike dhe të mbushura me kuptim personal, përfshirë një qëndisje të veçantë të qenit të saj. Këngëtarja 31-vjeçare kurorëzoi dashurinë e saj me Callum Turner në kryeqytetin britanik gjatë muajit maj, për të vijuar më pas me një festë madhështore në Itali muajin e ardhshëm. Ajo e ka cilësuar fustanin e markës prestigjioze Chanel Haute Couture, të cilin e veshi në ceremoninë e dytë, si krijimin estetik më mahnitës që ka parë ndonjëherë në jetën e saj. Veshja ekskluzive u realizua nga drejtori artistik i shtëpisë së modës, Matthieu Blazy. Interpretuesja e hitit "Levitating" pranoi se ky ishte koleksioni i parë i nusërisë i stilistit për markën dhe se veshja e këtij krijimi mbetet ndër kujtimet më të ndritura të jetës së saj. Gjatë fjalës së mbajtur në ceremoninë e përvitshme "Innovator Awards" të revistës WSJ, ku ajo nderoi stilistin së bashku me artistin A$AP Rocky, Dua i thuri elozhe Blazy-t, duke e falënderuar për realizimin e kryeveprës që ajo pati fatin të vishhte. Dua i dha stilistit liri të plotë krijuese për këtë fustan përrallor, i cili u stolis me gurë kristali dhe rreth 480 mijë rruaza, si dhe u kompletua me një bisht me pupla dhe një dizajn të hapur nga pas. Duke sjellë ndërmend procesin e krijimit, ajo tregoi me humor: "Kur më pyeti se sa dramatik e doja fustanin dhe sa pupla dëshiroja të kishte, përgjigjja ime e vetme ishte: 'Po'." Këto deklarata vijnë pasi interpretuesja e hitit "New Rules" kishte ndarë më herët përshtypjet e saj rreth atmosferës "magjike" që karakterizoi dasmën e saj me Callum-in. "Ceremonia ishte thjesht magjike. Na dhanë shumë sugjerime, por ne zgjodhëm të ndiqnim vetëm dy rregulla: ta shijonim ditën sikur të ishim mysafirë dhe ta kërkonim vazhdimisht njëri-tjetrin mes të pranishmëve, pa e humbur kurrë kontaktin pamor. Kështu, çdo kujtim e kemi ndarë së bashku", u shpreh ajo për revistën Vogue Italia. Ndërkohë, Dua Lipa tani synon të hulumtojë se "çfarë ndodh kur dikush gjen dashurinë e vërtetë" përmes artit të saj dhe procesit të krijimit të këngëve të reja.