Valë protestash në Gjermani: Brezi i ri ngrihet kundër kostos së jetesës dhe shërbimit të detyrueshëm ushtarak

Mijëra të rinj kanë dalë në sheshin e mbi 30 qyteteve gjermane në kuadër të lëvizjes “Gen Z regelt”, duke kërkuar masa konkrete ndaj rritjes së çmimeve, fonde më të larta për arsimin, mbrojtje më të madhe të mjedisit, si dhe kundërshtuar rikthimin e mundshëm të shërbimit ushtarak të detyruar. Sipas të dhënave të agjencive të lajmeve, vetëm në qytetin e Lajpcigut numri i protestuesve arriti në rreth 2 mijë veta, ndërkohë që qindra të tjerë u bashkuan me thirrjet e ngjashme në Dresden. Vala e demonstratave përfshiu një hartë të gjerë të vendit, duke u shtrirë në metropole kryesore si Berlini, Frankfurti, Hamburgu, Mainci dhe Këlni. Në kryeqytetin gjerman, qindra qytetarë u tubuan pranë monumentit ikonik të Portës së Brandenburgut. Për të garantuar rendin dhe sigurinë publike, autoritetet policore angazhuan rreth 1 500 efektivë shtesë në terren, një masë kjo e marrë edhe për shkak të përkimi kohor mes tubimeve dhe festimeve të natës së Halloween-it. Përmes kësaj nisme, gjenerata e re synon të ushtrojë presion institucional për përmirësimin e standardit ekonomik, intensifikimin e investimeve në sektorin arsimor dhe politikave klimatike, si dhe të shprehë kundërshtimin e prerë ndaj detyrimeve ushtarake.