Prapaskenat e kërkesave për dorëheqje: Çfarë fshihet pas synimit për largimin e Gërvallës dhe Sveçlës?

Veprimtari Halil Geci ka hedhur dritë mbi prapaskenat politike rreth thirrjeve të fundit për largimin e ministres Donika Gërvalla dhe ministrit Xhelal Sveçla, duke i cilësuar ato si pjesë e një strategjie më të gjerë për të lëkundur pozitat e kryeministrit Albin Kurti. Sipas tij, këto tendenca për t'i zhveshur nga përgjegjësitë dy prej figurave kryesore të ekzekutivit nuk kanë nisur rishtazi, por datojnë që nga koha e ardhjes në pushtet përmes mbështetjes masive qytetare. Geci ka theksuar se rasti tragjik i Arlinda Zekajt nuk duhet të shfrytëzohet si vegël për përfitime ditore politike apo për sulme të koordinuara ndaj Qeverisë. Ai ka vlerësuar se çdo pretendim për dorëheqje apo shkarkim duhet të mbështetet rreptësisht mbi fakte të provuara, shkelje të dokumentuara dhe përgjegjësi institucionale, e jo mbi akuza të pabazuara që i shërbejnë agjendave të caktuara. Duke analizuar zhvillimet aktuale, ai ka mbrojtur angazhimin e Xhelal Sveçlës në krye të dikasterit të sigurisë, duke e lidhur atë me përpjekjet e deritanishme për shtrirjen e sovranitetit dhe vendosjen e rendit në të gjithë territorin e vendit. Nga ana tjetër, ai ka fshikulluar qasjen e opozitës dhe të qarqeve të caktuara, të cilat sipas tij synojnë rikthimin e logjikës së kaluar dhe dëmtimin e proceseve të reformimit në drejtësi e sundim të ligjit.