Në shënjestër pasuria e pajustifikueshme: Analisti Gani Qarri zbërthen sfidat dhe përçarjet politike pas kalimit të ligjit për Byronë

Kuvendi i Kosovës ka bërë një hap domethënës në fuqizimin e kornizës ligjore kundër korrupsionit, duke miratuar në lexim të dytë Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. Me 66 vota pro, asnjë kundër dhe shtatë abstenime, ky akt normativ synon vënien nën kontroll dhe konfiskimin e pasurive të fituara pa mbulesë ligjore. Procesi i votimit pasqyroi qartë mospajtimet e thella mes grupeve parlamentare. Përderisa deputetët e Aleancës për Ardhmërinë e Kosovës (AAK) e mbështetën nismën ligjore, ata të Lidhjes Demokratike të Kosovës (LDK) zgjodhën të abstenohen, ndërsa shumica e parlamentarëve nga Partia Demokratike e Kosovës (PDK) nuk morën pjesë fare në votim. Kjo frymë ndasish ngre pikëpyetje mbi pengesat që mund ta shoqërojnë zbatimin e ligjit në praktikë. Lidhur me këtë ngjarje me peshë shtetërore, analisti politik Gani Qarri vlerëson se miratimi i projektligjit shënon një arritje të rëndësishme në luftën ndaj krimit të organizuar ekonomik dhe korrupsionit zyrtar. Megjithatë, ai tërheq vërejtjen se funksionimi i plotë i këtij mekanizmi do të jetë i vështirë pa një reformë rrënjësore në drejtësi dhe pa zbatimin e plotë të procesit të VETTING-ut. Duke analizuar rrugëtimin e kësaj nisme, Qarri nënshtron se projektligji ka kaluar përmes sfidash të shumta politike e procedurale, përfshirë edhe filtrimin nga Gjykata Kushtetuese. “Pikërisht për shkak të qëndrimeve të ndryshme dhe kundërshtimeve, me dhe pas arsye të partive politike opozitare, Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme është sfiduar ashpër dhe në mënyra nga më të ndryshmet, ku përveç shqyrtimit institucional e juridik për vlerësimin rrënjësor kushtetues, i është dashur të rrugëtojë edhe nëpër një labirint të pafund të diskutimit të ashpër publik të cilat kanë sjellë dy aktgjykime të Gjykatës Kushtetuese dhe vetëm pas kalimit me suksese, të gjithë kësaj odisejade disavjeçare, është bërë i mundur edhe miratimi në lexim të dytë të këtij Projektligji në Kuvendin e Republikës së Kosovës”, shprehet Qarri. Sipas analistit, votimi i suksesshëm i jep rrugë ngritjes së strukturave përkatëse verifikuese dhe nisjes së veprimeve konkrete në terren. “Miratimi me 66 vota për, asnjë kundër dhe 7 abstenime, në Kuvend i Projektligjit për Byronë Shtetërore i cili përcakton qartë kompetencat e kësaj Byroje për themelimin, organizimin, si dhe procedurat për verifikimin dhe konfiskimin e pasurisë së pajustifikueshme, ka shënuar hapin më të rëndësishëm edhe për forcimin e mekanizmave institucionalë dhe ka mundësuar fillimin praktik të Procedurës së Verifikimit për Konfiskimin e Pasurisë së Pajustifikueshme, luftimin me sukses në terren dhe trajtimin e papenguar ligjor të pasurisë së pajustifikueshme, të grumbulluar përmes korrupsionit dhe krimit të organizuar politik, ekonomik dhe institucional në gjithë vendin tonë”, deklaron ai. Në përmbyllje të analizës së tij, Qarri shton se amendamentet e propozuara nga PDK-ja dhe qëndrimet e ndryshme të opozitës gjatë seancës shpërfaqën mungesën e unitetit opozitar, duke dëshmuar se debati rreth zbatueshmërisë së Byrosë do të mbetet mjaft i nxehtë në skenën politike.