Kërkohet drejtësi për Arlindën dhe gratë e vrara: Prishtina ngrihet sërish sot në protestë

Kryeqyteti do të sjellë sërish sot në vëmendje kërkesën për drejtësi ndaj Arlindës dhe të gjitha grave që ranë viktimë e dhunës fatale. Qytetarët janë ftuar të mblidhen në orën 17:00 pranë sheshit “Zahir Pajaziti” në Prishtinë, për të vazhduar reagimin e tyre shoqëror. Organizimi i këtij marshimi është marrë përsipër nga Kolektivi për Mendim dhe Veprim Feminist. Sipas njoftimit të organizatorëve, protesta do të vijojë me marshim drejt ndërtesës së Qeverisë së Kosovës dhe Këshillit Prokurorial të Kosovës. Përmes këtij organizimi, aktivistët kanë paralajmëruar se rezistenca dhe mobilizimi i shoqërisë nuk do të ndalen me kaq, por do të vazhdojnë edhe gjatë ditëve të ardhshme, deri në realizimin e plotë të kërkesave të tyre. “Zëri ynë do të dëgjohet. Shteti do të japë llogari”, thuhet në thirrjen e kolektivit, përmes së cilës i bëhet apel të gjithë qytetarëve që t’i bashkohen protestës.