Britania e Madhe nis hetimin zyrtar ndaj gjigantit “Meta” për praktikat e reja tregtare

Autoriteti Britanik i Konkurrencës dhe Tregjeve (CMA) ka ndërmarrë një hetim zyrtar ndaj kompanisë “Meta”, për të verifikuar nëse politikat e saj të reja tregtare për botuesit e mediave dhe bizneset në përgjithësi përbëjnë shkelje të rregullave të konkurrencës së lirë. Fokusi kryesor i këtij hetimi janë kushtet që mund t’i japin kompanisë mëmë të “Facebook” dhe “Instagram” të drejtën për të grumbulluar material nga faqet e internetit të botuesve dhe ndërmarrjeve, duke i shfrytëzuar ato për përmirësimin e produkteve dhe shërbimeve të veta, përfshirë këtu edhe teknologjitë e inteligjencës artificiale, pa u lënë hapësirë bizneseve që të vendosin vetë nëse dhe si dëshirojnë të lejohet ky përdorim. Sipas vlerësimeve të CMA-së, detyrimi i botuesve dhe kompanive të tjera për të pranuar këto kushte rrezikon të krijojë një imponim të padrejtë tregtar për mijëra sipërmarrje britanike, të cilat varen nga rrjetet e “Meta”-s për të komunikuar me audiencën dhe klientët e tyre. Organizmi rregullator britanik do të analizojë nëse “Meta” gëzon një pozitë dominuese në tregun vendas dhe, në rast se kjo konfirmohet, do të verifikojë nëse kushtet e vendosura përkojnë me një abuzim të kësaj fuqie tregtare, në kundërshtim me legjislacionin e konkurrencës në fuqi që daton nga viti 1998. Kujtojmë se “Meta” kishte parashikuar fillimisht aplikimin e kushteve të reja më 30 tetor, por pas dialogut me autoritetet e Mbretërisë së Bashkuar, afati u shty fillimisht për në 20 nëntor. Më vonë, datën 28 tetor, drejtuesit e kompanisë vendosën ta ndalin përkohësisht zbatimin e këtyre ndryshimeve derisa të mbyllen fazat e konsultimit me përfaqësuesit e sektorit dhe grupet e biznesit. Drejtoresha ekzekutive e CMA-së, Sarah Cardell, u shpreh se ndonëse platformat digjitale luajnë një funksion thelbësor për tregtinë, ato kompani që mbajnë pozita monopoliste apo dominuese nuk duhet t'i shfrytëzojnë ato për të diktuar kushte të papranueshme. Ajo nënvizoi se institucioni po ndërhyn për të shqyrtuar nëse ndryshimet e paralajmëruara nga “Meta” bien ndesh me ligjin, duke synuar një zgjidhje sa më të shpejtë të kësaj situate. Nga ana e saj, “Meta” ka refuzuar pretendimet, duke deklaruar se nuk ka asnjë bazë të vërtetë për nisjen e një hetimi të tillë. Një përfaqësues i kompanisë bëri të ditur se ajo mbetet e përkushtuar që të mos ndryshojë kushtet e tregtimit pa diskutuar paraprakisht me botuesit dhe palët e tjera të prekura. Po ashtu, nga kjo kompani u theksua se mirëpresin mundësinë për t'i sqaruar pozicionin e tyre autoriteteve rregullatore britanike. Ndërkohë, CMA ka bërë me dije se procesi hetimor ndodhet vetëm në fazën fillestare dhe se ende nuk është marrë ndonjë vendim përfundimtar mbi fajësinë e mundshme të “Meta”-s në lidhje me ligjin e konkurrencës. Në vijim, autoriteti do të mbledhë dhe analizojë të gjitha provat e nevojshme nga kompania dhe subjektet e treta që preken drejtpërdrejt nga këto rregulla. Në një zhvillim të veçantë, institucioni britanik i konkurrencës po kërkon të dhëna shtesë nga “Meta” edhe lidhur me shërbimin e ri me abonim për bizneset, të pagëzuar si “Meta One”. Këto shqetësime lidhen me ndikimin që ky shërbim mund të ketë te ndërmarrjet e vogla, të cilat publikojnë linke drejt faqeve të jashtme në “Facebook” dhe “Instagram” pa qenë të detyruara të paguajnë tarifë abonimi. Lidhur me këtë aspekt të fundit, CMA ende nuk ka marrë një vendim nëse do të hapë apo jo një procedurë të mirëfilltë zyrtare.