Evropiani në prag: Norvegjia zbulon kartat, pesë fytyra të reja në listën e Gjekstad

Përzgjedhësi i kombëtares norvegjeze të hendbollit për femra, Ole Gustav Gjekstad, ka zyrtarizuar grupin me 19 lojtare që do t'i nënshtrohen fazës përgatitore dhe do të marrin pjesë në turneun prestigjioz “Ajs Kup”, i cili do të zhvillohet gjatë muajit nëntor. Në këtë listë spikasin pesë hendbolliste të cilat nuk numërojnë asnjë paraqitje të mëparshme në ngjarje të mëdha me përfaqësuesen e parë. Megjithatë, burime nga stafi teknik sugjerojnë se dy ose tri prej tyre rrezikojnë të mbeten jashtë listës përfundimtare për udhëtimin drejt Rumanisë. Gjekstad shpjegoi se procesi i përzgjedhjes është udhëhequr nga forma aktuale e lojtareve në skuadrat e tyre, statistikat individuale, paraqitjet në grumbullimet e kaluara, si dhe konsensusin e përbashkët mes stafit teknik dhe departamentit mjekësor. Si pjesë e programit përgatitor, norvegjezet do të akomodohen në Stjørdal për të marrë pjesë në turneun “Ajs Kup”. Aty ato do të masin forcat me Ishujt Faroe dhe Holandën nga data 26 deri më 28 nëntor, ndërsa më 30 nëntor skuadra do të niset zyrtarisht drejt tokës rumune. Në kuadër të Kampionatit Evropian, Norvegjia është pozicionuar në një grup sfidues, ku do të përballet me Maqedoninë e Veriut, kombëtaren pritëse Rumaninë, si dhe Zvicrën. Vlen të theksohet se ky grup ka lënë jashtë disa nga figurat më të njohura të hendbollit norvegjez, ku spikasin mungesat e Vilde Ingstad, Veronica Kristiansen dhe Stine Skogrand. Pavarësisht këtyre mungesave, Kombëtarja e Norvegjisë ruan një profil të lartë, duke kombinuar në mënyrë harmonike elementin e ri me përvojën e gjatë, çka e pozicionon sërish si një prej pretendentët kryesorë për të rrëmbyer medaljen e artë në këtë kampionat.