Hartimi i Strategjisë 2035+, ministri Çeku bashkëbisedon me prindërit në Pejë dhe Gjakovë

Ministri i Arsimit dhe Shkencës, Hajrulla Çeku, ka zhvilluar një sërë takimesh me prindërit në qytetet e Pejës dhe Gjakovës, në kuadër të procesit të konsultimit për hartimin e Strategjisë së Arsimit 2035+. Sipas njoftimit zyrtar, këto takime u organizuan në bashkëpunim të ngushtë me Këshillin e Prindërve të Kosovës, me qëllim parësor integrimin e zërit të prindërve në përcaktimin e objektivave dhe prioriteteve kryesore për të arsimuarit e vendit. Gjatë bashkëbisedimit të zhvilluar në Gjakovë, ministri Çeku, i shoqëruar nga kryetari i Këshillit të Prindërve të Kosovës, Besnik Dragusha, bashkëbisedoi hapur me prindërit rreth sfidave, kërkesave dhe pritshmërive të tyre për mbarëvajtjen e sistemit arsimor. Gjatë këtij takimi, u vu theksi te rëndësia e madhe e bashkëpunimit të ndërsjellë, ku ministri vuri në pah se kontributi i prindërve është i pazëvendësueshëm për të garantuar se ky dokument strategjik do t'i përgjigjet realisht nevojave të nxënësve dhe komunitetit. Edhe Dragusha e quajti thelbësore pjesëmarrjen aktive të kësaj kategorie në vendimmarrje. Në kuadër të agjendës së tij në Gjakovë, Çeku i prirë nga zëvendësministri i Arsimit, Muhedin Nushi, inspektuan punimet në shkollën e re të fshatit Ponoshec – një investim ky i ndërmarrë nga dikasteri i arsimit që pritet t'ë hapë dyert për nxënësit në një të ardhme të afërt. Po ashtu, delegacioni vizitoj ambientet e Bibliotekës “Ibrahim Rugova”. Në anën tjetër, gjatë ndalesës në qytetin e Pejës, kreu i arsimit shprehu mirënjohjen e tij për interesimin e lartë dhe gatishmërinë e treguar nga prindërit për të dhënë kontributin e tyre në ndërtimin e vizionit për shkollat ku edukohen fëmijët e tyre. Në të dyja komunat, prindërit patën mundësinë të shpalosin përvojat personale, brengat dhe synimet e tyre për të ardhmen e brezit të ri, duke e pasuruar procesin me ide dhe propozime konkrete, bëhet e ditur në njoftim.