Kufizimi i rrjeteve sociale për fëmijët, Rama: Së shpejti nisim konsultimet në të gjitha shkollat

Kryeministri Edi Rama ka bërë të mundur një thirrje për hapjen e një debati gjithëpërfshirës rreth kufizimit të aksesit të të miturve në platformat digjitale. Gjatë fjalës së tij, ai nënvizoi se ndikimi i ambientit online dhe ekspozimi i vazhdueshëm ndaj modeleve agresive kërkojnë një reagim të koordinuar mes shtetit, familjeve dhe trupës mësimore. Këto deklarata u bënë gjatë mbledhjes së Këshillit Kombëtar për të Drejtat dhe Mbrojtjen e Fëmijëve, ku kreu i Qeverisë shtroi për diskutim nevojën e përcaktimit të rregullave dhe kritereve moshore për hapjen e profileve personale në rrjetet sociale nga ana e të miturve. “Duhet hapur debat se si dhe kur duhet të kufizojmë aksesin në rrjetet sociale të të miturve. Deri në cilin kufi moshe 16 apo 18 vjec, në mënyrë që të mos kenë më mundësinë të krijojnë llogari individuale në rrjetet sociale”, u shpreh Rama, duke konfirmuar se nisma do të shoqërohet me tryeza diskutimi me prindërit dhe mësuesit në institucionet arsimore të vendit. Duke e cilësuar këtë si një qasje që tashmë po ndiqet edhe në shtete të tjera perëndimore, ai shtoi: “Ne do të nisim konsultimet për këtë çështje, duke filluar diskutimin me mësuesit dhe prindërit në të gjitha shkollat, për kufizimin e përdorimit të rrjeteve sociale nga të miturit. Ky është tashmë një trend që po identifikohet në një sërë vendesh demokratike”. Në të njëjtën kohë, shefi i ekzekutivit vuri theksin te rëndësia e pasurimit të jetës sociale dhe kulturore të fëmijëve, duke e kapërcyer kufirin e ngushtë të aktiviteteve vetëm në fushën e sportit. Sipas tij, është detyrim institucional që të ofrohen hapësira për përfshirjen e tyre në art, kinematografi, pikturë dhe zejtari. “Një tjetër çështje shumë e rëndësishme është puna që duhet të bëjmë së bashku, institucionet dhe shoqëria civile e interesuar për këtë fushë, për të zgjeruar gamën e aktiviteteve të fëmijëve dhe aktivitetet e tyre sociale. Këto aktivitete duhet të shtrihen nga sporti te kultura, duke përfshirë të gjitha fushat që lidhen me skenën, pikturën, zejen, artin, filmin, fotografinë e shumë të tjera”, deklaroi ai. Si pjesë e kësaj strategjie, Rama paralajmëroi se duke filluar nga viti i ardhshëm shkollor, Qeveria do të vërë në dispozicion një buxhet të veçantë për të mundësuar orarin e zgjatur të fëmijëve brenda mjediseve shkollore. “Zgjatja e qëndrimit të fëmijëve në shkollë është dicka që do të fillojë menjëherë vitin e ardhshëm. Kemi vendosur dhe një buxhet të posaҫëm në mënyrë që prindërit të vazhdojnë të punojnë dhe fëmijët të jenë në mjediset e shkollës deri në orën 5 pasdite”, tha ai. Përfundimisht, kjo masë synon t'u sigurojë prindërve qetësinë e vazhdimësisë në punë, ndërkohë që fëmijët do të edukohen dhe argëtohen në një hapësirë të sigurt dhe të kontrolluar gjatë pesë ditëve të javës.