“Shpresoj ta shoh prapa grilave” – Deputeti i Vetëvendosjes ashpër ndaj kryetarit Përparim Rama

Zhvillimet e fundit rreth ftesës për intervistim nga Prokuroria Speciale për kryetarin e Prishtinës, Përparim Rama, lidhur me iniciativën “Arkitekti i Qytetit”, kanë ngjallur reagime të forta në skenën politike. Lëvizja Vetëvendosje e ka mirëpritur këtë proces, ndërsa deputeti i kësaj partie, Egzon Azemi, ka shprehur hapur qëndrimin e tij se dëshiron ta shohë të parin e kryeqytetit prapa grilave sa më parë. “Shpresoj e besoj që sa më parë të përfundojë në burg z. Rama,” u shpreh Azemi gjatë një paraqitjeje televizive. Sipas ligjvënësit të pushtetit, kreu i Komunës së Prishtinës i ka shkaktuar dëme të rënda buxhetit lokal përmes këtij projekti. Ai ka theksuar se Rama mban përgjegjësi të drejtpërdrejtë penale për mënyrën se si janë menaxhuar fondet publike në këtë rast.