Fluturimi surprizë i Donald Trump me "Air Force One" për fëmijët trazon trafikun ajror në Uashington

Një kalim i pazakontë në lartësi të ulët i avionit presidencial mbi Shtëpinë e Bardhë, i planifikuar në kuadër të një feste të Halloween-it për fëmijët, ka shkaktuar kaos në trafikun ajror dhe pakënaqësi mes banorëve të kryeqytetit amerikan. Ngjarja solli vonesa në dhjetëra fluturime dhe alarmoi autoritetet lokale. Operacionet e trafikut ajror në një ndër nyjet kryesore të qytetit u ndërprenë përkohësisht, ndërkohë që zyrtarët vendas e cilësuan veprimin si të papritur, pasi kishin marrë njoftim zyrtar vetëm 15 minuta përpara se ai të ndodhte. Konkretisht, avioni zyrtar "Air Force One" realizoi dy fluturime në kuota të ulëta mbi rezidencën presidenciale. Për pasojë, Administrata Federale e Aviacionit (FAA) u detyrua të bllokojë përkohësisht lëvizjet në Aeroportin Kombëtar "Reagan" të Uashingtonit, i cili ndodhet në afërsi, ndërsa mjeti fluturues kaloi edhe mbi zona të dendura banimi. Në ato momente, kreu i shtetit po priste fëmijët në një festë festive të organizuar për Halloween. Vetë Shtëpia e Bardhë ndau pamje vizuale në rrjetet sociale, shoqëruar me diçiturën: "Një fluturim epik i 'Air Force One' mbi Shtëpinë e Bardhë për fëmijët që erdhën për të marrë ëmbëlsira!" Megjithatë, reagimi nga Këshilli Bashkiak i Distriktit të Kolumbisë ishte kritik. Sipas këtij institucioni, informacioni për fluturimin kishte mbërritur vetëm 15 minuta më herët "për të gjithë në qendër të Uashingtonit, në Pentagon dhe në Aeroportin Kombëtar. Kjo frikësoi shumë njerëz, përfshirë edhe ne." Edhe përfaqësues të linjave ajrore konfirmuan se ishin vënë në dijeni më pak se një orë para nisjes së ngjarjes. Udhëtarët që po udhëtonin drejt Uashingtonit dëshmuan se avionët e tyre u desh të vërtiteshin në ajër përpara se të merrnin lejen për ulje, ose u përballën me shtyrje të orareve. Të dhënat nga platforma e gjurmimit të fluturimeve "FlightAware" treguan se 26 për qind e nisjeve dhe 17 për qind e mbërritjeve u vonuan gjatë asaj dite, duke shënuar një total prej 202 fluturimesh të prekur, kryesisht si rrjedhojë e drejtpërdrejtë e bllokimit të përkohshëm të aeroportit. Fluturimet e kësaj natyre me "Air Force One" zakonisht përdoren gjatë aktiviteteve të rëndësishme sportive ku merr pjesë presidenti Trump.