Arteta pas skandalit në Kupën e Ligës: Kjo nuk është Disneyland, por futboll profesionist

Trajneri i Arsenalit, Mikel Arteta, ka thyer heshtjen pas përjashtimit me karton të kuq të talentit Max Dowman, incident ky që ndodhi gjatë disfatës së bujshme të skuadrës londineze përballë Fleetwood Town në kuadër të Kupës së Ligës. Klubi nga Londra u largua nga gara pas një barazimi 1-1 në kohën e rregullt, për të pësuar më pas me rezultatin 5-3 nga ekzekutimi i penalltive kundër ekipi që garon në kategorinë e katërt të futbollit anglez. Për “Topçinjtë”, mbrëmja u komplikua edhe më shumë kur 16-vjeçari Dowman u ndëshkua me karton të kuq vetëm pesë minuta para mbylljes së kohës së rregullt, pas një ndërhyrjeje në duel me Harrison Neal. Ky vendim për përjashtimin e adoleshentit u cilësua si mjaft i debatueshëm, kurse pamjet e reagimit të Artetas teksa lojtari po lëshonte fushën e gjelbër ngjallën valë të shumta kritikash në opinionin sportiv. Megjithatë, strategu spanjoll ka dalë në mbrojtje të qasjes së tij, duke nënvizuar se lojtari i ri duhet të jetë i vetëdijshëm për detyrimet dhe peshën që mban fanella e skuadrës. “Ne nuk jemi në Disneyland, jemi në Premierligë”, u shpreh prerë Arteta, duke shtuar se “futbollisti duhet ta fitojë të drejtën për të luajtur, njësoj si të gjithë të tjerët. Ne kujdesemi shumë për të, por në të njëjtën kohë do të jemi kërkues, sepse ai duhet ta fitojë të drejtën për të luajtur”. Në ndërkohë, pasi Federata e Futbollit refuzoi apelin e paraqitur nga Arsenali, i riu është ndëshkuar me tri ndeshje pezullim shkaku i akuzës për sjellje të dhunshme. Në fjalën e tij, kreu i stolin londinez nuk fshehu as zhgënjimin ndaj masës disiplinore, duke argumentuar se sfiduesit e Dowmanit kishin shfaqur pakujdesi në ndërhyrjet e tyre gjatë lojës dhe se reagimi i lojtarit të tij kishte qenë tejet i vogël në krahasim me trajtimin që i ishte bërë në fushë.