Arritje të mëdha te gjigantët spanjollë: Dani Olmo feston 100 ndeshje mes dëmtimeve, Courtois drejt rekordit historik te Reali

Dani Olmo dhe Thibaut Courtois kanë shënuar momente të rëndësishme në karrierën e tyre me dy skuadrat më të mëdha spanjolle, Barcelonën dhe Real Madridin, duke u bërë protagonistë të mediave sportive. Te Barcelona, mesfushori Dani Olmo është nderuar nga drejtuesit e klubit dhe bashkëlojtarët e tij për regjistrimin e 100 ndeshjeve zyrtare me fanellën blaugrana. Ai e preku këtë jubilar në sfidën e Ligës së Kampioneve kundër Paris Saint-Germain, megjithatë festa e tij u la në hije nga një dëmtim i shkallës së parë në aduktorin e majtë, i cili do ta mbajë larg fushave për një periudhë prej tre deri në katër javë. Gjatë këtyre 100 paraqitjeve, Olmo ka luajtur 67 ndeshje në La Liga, 22 në Champions League, tetë në Kupën e Mbretit dhe tri në Superkupën e Spanjës. Përveç 21 golave të shënuar, ai ka fituar me katalanasit dy kampionate, një Kupë Mbreti dhe dy Superkupa të Spanjës. Ndërkohë, në kampin e Real Madridit, portieri Thibaut Courtois po bëhet gati për një arritje historike. Gardiani belg pritet të rikthehet nën urdhrat e trajnerit për ndeshjen kundër Racing Santanderit, pasi mungoi në "El Clasico" për shkak të një gjendjeje gripale. Me zbritjen e tij në fushë në këtë takim, Courtois do të barazojë shifrën e legjendës Miguel Ángel me 346 ndeshje për Real Madridin, duke siguruar vendin e tretë në historinë e klubit sa i takon portierëve me më shumë paraqitje. Përpara numrit një të madrilenëve qëndrojnë vetëm Pako Bujo me 454 ndeshje dhe ikonë Iker Casillas, i cili mban rekordin absolut me 725 ndeshje. Gjatë tetë viteve të kaluara në Madrid, belgu ka ngritur lart dy trofe të Champions League, katër tituj të La Ligës dhe shumë trofe të tjerë. Pavarësisht problemeve fizike që e kanë pëasuar në sezonet e fundit, drejtuesit e Realit synojnë të sigurojnë shërbimet e tij deri në vitin 2028, duke konfirmuar edhe një herë tjetër statusin e tij si një ndër portierët më të mëdhenj në historinë e klubit.