Kryeministri Rama: Studentët po kërcënohen me gjuhë kriminale, prindërit po luten për ndihmë

Kryeministri i Shqipërisë, Edi Rama, ka bërë një reagim të fortë lidhur me pretendimet për presion, intimidim dhe kërcënime ndaj studentëve që zgjedhin të mos bëhen pjesë e protestave. Gjatë prononcimit të tij, kreu i Qeverisë u shpreh se nuk e kishte imagjinuar kurrë se do të përballej me një realitet ku liria e shprehjes në Shqipëri kufizohet nga presioni i atyre që thirren për të përmirësuar vendin, duke theksuar se tubimet nuk duhet të kthehen kurrë në mjete dhune verbale apo fizike ndaj kundërshtarëve. “Nuk e kam menduar ndonjëherë që do jetoja një Shqipëri ku frika për të folur do ushqehej nga intimidimi i atyre që protestojnë për ta bërë Shqipërinë më të mirë. Unë protestoj për ta bërë Shqipërinë më të mirë, dhe nëse ti nuk je dakord me mua, unë të intimidoj të kërcënoj dhe të vendos para një zgjedhjeje, që është zgjedhje dramatike. Ose të jesh me mua, të mos vish në mësim, ose të jesh target i dhunës sime”, u shpreh ai. Më tej, Rama bëri të publike faktin se ka marrë komunikime të shumta nga të rinjtë dhe familjarët e tyre, të cilët ndodhen nën trysni të vazhdueshme. “Kam dhjetëra mesazhe studentësh që luten që të mbeten anonimë, se kanë frikë. Kam dhjetëra mesazhe të prindërve të studentëve që luten për ndihmë, pasi ndihen të pafuqishëm ndaj fëmijëve të tyre që ndihen të kërcënuar dhe të intimiduar. Një gjuhë që është kriminale. Mbështetje familjeve që nuk duhen lënë vetëm përballë këtyre”, përfundoi kryeministri.